Двоязычны таблы на Словакії будуть єднако великы і єднакой фарбы

Двоязычны таблы, котры коло драг означуть назвы сел, будуть поступно мінити ся. Покля дотеперь таблы із назвов села або міста в языках народностных меншын были меншы і сині, по новому будуть єднако великы як таблы зо словацьков назвов, і будуть білы як і словацькы. Синій зістане лем рамик коло таблы.

Інформовала о тім словацька державна пресова аґентура TASR на основі пресконференції, котру у віторок 20-го фебруара 2018-го року зробив міністер транспорту Арпад Ершек із партії Most-Híd.

„Поступно ся будуть мінити і буде їх мінити тот, хто справує драгу,“ повів міністер на пресконференції коло Шаморіна. Таблы коло драг сел і міст змінять села і міста, при драгах другой і третьой класы то будуть высшы теріторіалны цілкы (краї) і при драгах першой класы то буде Словацька справа драг, котра є під резортом транспорту. На драгах першой класы бы ся за словами Ершека мало вымінити 384 табліць, з того 325 мадярьскых, решта русиньскых.

Зміна ся діє на основі новой выголоскы Міністерства внутрішніх справ, котра платить од фебруара того року. О зміну пожадав міністра внутрішніх справ міністер транспорту. Така зміна має забезпечіти, же таблы в языках народностных меншын буде веце видіти. „Теперь є то, думам сі, комфортніше і европскіше, як было дотеперь,“ оцінив зміну Ершек.

Двоязачны означіня сел і міст ся хоснують в припаді, кідь є кількость членів народностной меншыны в місті або селі мінімално 20 процент. Зміна буде подля міністра транспорту проходити так, жебы не были барз затяжены розрахункы справователів драг.

Жрідло фотоґрафії: TASR

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА