Едукацийна стріча в Рускій Бурсі

Днес, то є 15 грудня 2013 рока, в Рускій Бурсі в Ґролицях мала місце едукацийна стріча.
Як перший з прелєкцийом Новосільскій – провокатор ци пророк? выступил Томаш Марія Прокоп з Ягайллоньского Університету. Пак, по ретельным выкладі о жытю і творчости того контроверсийного артысты, прелєґент одповідал на звіданя публикы.

В другій части бесідувала Марія Вірхняньска з Ґладышова, ученниця ліцеальной школы, про свою історичну працу Ґладышівскы польско‑лемківскы ночы і дни по II світовій війні, яка выріжнена остала II місцьом на XVII Конкурсі Близка Істория: Полякы і сусіды по другій світовій війні: разом, обік себе, проти собі… орґанізуваного Осередком Карта.
Дискусия про польско-лемківскы реляциі, яка вывязала ся по презентациі, попроваджена перез орґанізатора стрічы Мірослава Пелехача, остала перекєрувана на конкретний аспект тых реляций, а докладні – бесідникы старали ся найти одповід на звіданя: як порадити собі з орґанізацийом вельокультуровых весіль?

Уж тепер запрашаме до обзераня фотореляциі з подіі (за тым мотузком), а на біжучо будеме інформувати коли на антені радия лем.фм появит ся проґрам про тоту подію.

Шырше о прелєкциі чытайте на terazgorlice.pl