В Комлошці собі припомянули Ґабріела Гаттінґера

В неділю 19-го юла 2026-го року в русиньскім селі Комлошка в Мадярьску припомянули собі десяту річніцю смерти Ґабріела Гаттінґера-Клебашко – русиньского поета, културно-общественного діятеля і політіка серед Русинів Мадярьска.

Орґанізатором події быв домашній русиньскый актівіста Ласло Поповіч, котрый быв добрым приятельом Ґабріела Гаттінґера. На події были участны Ґеорґій Фірцак із Румунії – підпредседа Світового конґресу Русинів, членове Світовой рады Русинів – Мартін Караш за Словакію, і Микола Бобинець за Україну.

На події так само взяли участь Русины із Румунії, Словакії, Україны, як і домашні.

Ґабріел Гаттінґер-Клебашко (30. 10. 1958 р. – 26. 7. 2016 р.) – быв родаком із Комлошкы. В 1991-ім році  быв єдным із основателів першого русинського  общества – Орґанізації Русинів в Мадярьску. Занедовго, почас ІІ. Світового Конґресу Русинів, котрый проходив в Криниці в 1993-ім році, тота орґанізація была прията до конґресу, а Гаттінґер став членом Світовой Рады Русинів.

Гаттінґер в роботах конґресу часто піднимав політічны проблемы, бо видів потребу політічной актівности Русинів так на домашній, як і на меджінародній уровни, але в тот час быв єдным із невельо діячів Світового Конґресу Русинів, котры ясно звертали на тото увагу.

В 1998-ім році было основане Вседержавне русиньске самосправованя в Мадярьску, котрому шефовав до 2002-го року, а окрем того быв на посаді радника Комісії про людьскы права при Парламенті Мадярьска.

Вышло му дакілько зборників поезії, причім стихы писав по русиньскы, по мадярьскы, і по словацькы.

Занимав ся так само перекладами. Перекладав творчость Александра Духновіча – мало познаты віршы, денникы, корешпонденцію і іншы записы, котры будитель написав по мадярьскы. В 2011-ім році Гаттінґер став лавреатом Премії імеми Антонія Годинкы.