Третя і послідня подія реалізувана в рамках проєкту Pro Rusyn Radio Programme проходила в днях 11.-12. листопада/новембра т.р. в Будапешті.
Дводньовий семінар в Будапешті был підсумуваньом цілого проєкту та здобытого знаня і досвідчыня звязаного з меншыновом журналистиком і выникаючом з ней специфіком роботы. Участникы стрічы мали нагоду вымінити своі погляды тыкаючы журналистикы серед меншыновых ґруп. Бесідувано про можніст і способы розвитку меншыновой журналистикы. Треті варштаты тыкали тем культурной анімациі Русинів, іх інтеґрациі і знаня істориі Русинів жыючых на обшыри держав Вышеградской Ґрупы. В рамках семінара доповід про історию русиньского языка та русиньской журналистикы выголосил проф. Михал Капраль. Русиньскій дослідник представил тіж сучасну ситуацию русиньского языка на Мадярах і проблемы звязаны з тамтышньом кодифікацийом.
Завдякы русиньскій депутатці – Вірі Ґіріц, участникы семінара візитували будинок парляменту в Будапешті.
Проєкт реалізуваний єст Стоваришыньом «Руска Бурса» в Ґорлицях і його медияльном ґрупом ЛЕМ.фм, Русиньскым культурно-освітнім обществом А. Духновича (Rusínsky kultúrno-osvetový spolok A. Duchnoviča v Prešove) та Вседержавным Русиньскым Самоурядом з Будапешту (Országos Ruszin Önkormányzat – www.rusyn.hu).
фот. Даміан Новак
Коментарі