Експерты про охорону языковых прав – віторок, год. 20.10

29. листопада/новембра тр. в Бюрі Омбудсмана Польщы в Варшаві проходила дебата про охорону языковых прав. Подія орґанізувана была через Омбудсмана та выділ «Artes Liberales» Варшавского Університету з нагоды Медженародного Року Корінных Языків (2019) принятого резолюцийом Загального Згромаджыня ОЗН.

Ґрупа запрошеных експертів дискутувала про тему охороны языковых прав. Участ в ній взяли: Станіслав Кордасєвич в Варшавского Університету, Марцін Сосняк з Бюра Омбудсмана Польщы, Марек Шольц – радный м. Варшава, спілавтор закону о шлезскым і вілямівскым языках, што был зложеный в Соймі VIII каденциі, та Сільвія Куаттріні з позаурядовой орґанізациі про охорону прав меншын Minority Rights Group International.

Просиме выслухати двох выступлінь: Станіслава Кордасєвича та Марціна Сосняка. С. Кордасєвич бесідує м.ін. про документ выпрацуваный через експертів протягом Медженародного Року Корінных Языків, в котрым звертат ся увагу на тото, як охорона корінных, меншыновых ци загыбаючых языків влият на економічный розвиток іх хоснувателів. Бесідує тіж, што языковы права то просто част прав чловека. Без забезпечыня права до свобідной комунікациі, доступу до вчыня свойого языка тяжко ґарантувати інчы основны права, як прим. право до розвиваня свойой культуры. Марцін Сосняк представил увагы Омбудсмана до ґаранцийной системы языковых прав в Польщы, розповіл, як єст реалізувана, якы вантпливости родит і тіж якы має бракы.

Початок реляциі год. 20.10

Фот. Agata Steifer