ЕСЛП: Мадярьско має незаконны правны рамкы про меншыны при парламентных выборах

Часть выборчой сістемы, котра управлює выборы в припаді голосуючіх спосеред народностных меншын, порушує Европскый договор о людьскых правах.

О тім вердікті Европского суду про людьскы права (ЕСЛП) в Штрасбурзі, котрый быв вынесеный 10-го новембра 2022-го року , написав у віторок 29-го новембра мадярьскый портал hvg.hu, інформує аґентура TASR.

Суд дав за правду двом голосуючім спосеред членів народностных меншын. Єдночасно нарядив Мадярьску, жебы змінити тоты правны рамкы. Сенат сконштатовав, же сучасный мадярьскый выборчій закон не забезпечує достаточно „слободне выражіня поглядів людей при выбері законодавчого орґану“.

Членове тринадцятьох в Мадярьску признаных народностных меншын мали 3-го апріля того року в рамках парламентных выборів вже третій раз можливость выберати собі свого представителя в парламенті.

Як конштатує Европскый суд про людьскы права, голосуючі спосеред народностных меншын, мають можливость вырішыти, ці хотять выберати з цілодержавного партійного кандідатьского списку, значіть голосовати класічно за політічны партії і їх кандідатів, або зо списку народностной меншыны.

Причім тоты, котры хотять голосовати за народностный список, мусять зречі ся выбераня з партійного списку.

Далшов проблемов є, же в припаді, же хотять люди выберати з кандідачного списку народностной меншыны, мусять ся окремо реґістровати. Суд крітікує мадярьску выборчу сістему і з той причіны, же таков повиннов реґістраційов є порушене право тайного голосованя.

Припоминаме, же повинность реґістрації не є в рамках меншыновых выборів лем в Мадярьску. Реґістровати ся мусять наприклад і членове народностных меншын в Сербії, покля хотять голосовати у выборах до націоналных совітів – самосрпавных меншыновых орґанів.

Но так само є фактом, же выборы до націоналных совітів у Сербії суть одділены од парламентных выборів.

Меншыновый кандідачный список в Мадярьску є запертым списком, котрый не дає можливость досправдового проявліня волі голосуючіх, і подля вердікту Европского суду про людьскы права прінціпіалным обмеджіньом права є і факт, же з тринадцять народностных меншын в Мадярьску аж єденадцять має так малу кількость членів, же в смыслі актуално платного выборчого закона не мають ани лем математічну шансу здобыти повноцінный посланецькый мандат, і мають лем мандат такзваного парламентного говорцю – спікера.

То і припад Русинів в Мадярьску, котры тот рік знова выбрали за свого представителя, говорцю в парламенті Віру Ґіріц.

Говорця є членом парламенту, може інтерпеловати, але не має право голосовати. Покля є членом даякого парламентного комітету, там уж має і право голосовати. Русины не мають достаточне чісло членів народностной меншыны, котры бы ся могли реґістровати до меншыновых выборів, жебы выбрали собі повноцінного посланця.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА