Евалюация з Лемками

В гостинных просторах Союзу Словаків в Кракові одбыла ся стріча з Ріком Тербек з одділіня внутрішньой контролі і евалюациі Рады Европы в Штрасбурґу.

В пятницю, 18 вересня т.р., пані Ріка Тербек стрітила ся з представниками жыдівской, лемківской і словацкой мешыны в Польщы. Інтерсували єй проблемы спілпрацы лемківскых орґанізаций з представниками Рады Европы і урядом Польской Республикы. Долше тырвало омавляня рапортів уряду в одношыню до лемківской меншыны і рішынь Рады Европы в справі попередньо зголошеных Лемками проблемів. Лемківскы соспільны орґанізациі на стрічы репрезентували Олена Дуць-Файфер і Богдан Ґамбаль.

Як основний проблем Лемків зголошене было недотримуваня польскым урядом обовязуючого закону про нацийональны і етнічны меншыны і постійне порушаня го, коли іде о інтерпретацию дефініциі лемківской етнічной меншыны. Міністер доднес в состав лемківской меншыны зачыслят деякы украіньскы соспільны орґанізациі, котрых діяльніст протвидіє основным лемківскым, русиньскым цілям в обшыри достоменности.

Пані Ріка Тербек заповіла, же вшыткы зголошены представниками Лемків проблемы найдут ся в рапорті, котрий прирыхтує для Рады Европы. Просмотрят скорше рапортуваны комісиі лемківскы вопросы і дотеперішні способы іх розвязаня. Заповіла, же вшыткы зголошены справы можут быти омавляны на европейскій комісиі до справ меншын. А о ефектах тых діянь будут повідомлены головны лемківскы орґанізациі, котры зголосили желяня стрітити ся з паньом, котра занимат ся евалюацийом діянь репрезентантів Рады Европы до справ меншын.