Концерт міні-Терочкы в Ставишы

Рокы летят. То банал і правда стара як світ. Коли Терочка зачынала співати, єй члены іщы далеко мали до скінчыня основной школы. Днес – в більшій мірі, то студенты. Рокы летят. Терочка співат дале, але наступны малы (в сенсі молоды) Терчата пхают ся на сцену.

Міні-Терочка свій дебют має уж за собом. З успіхом заколядувала на великій сцені Ґорлицкого Центру Культуры. Тепер просят, жебы попозерати на них і послухати іх в дакус інчым репертуарі. Міні-Терочка выступит на мініфестині для діти «Привитаня Літа», якій пройде в Ставишы в найблизшу неділю, 23. червця/юнія 2019 р. Дрібницьовый проґрам чытайте ниже.