«Лемковина, на Низкым Бескіді» – стріча з Якубом Ґузіком та Данутом Павловском

Руска Бурса просит на авторску стрічу з Якубом Ґузіком та Данутом Павловском, авторами блоґа «Лемковина, на Низкым Бескіді».

«Од парох років познаєме Низкій Бескід. Його ясны і темны страны. Вандруючы, стараме ся одкрыти як найвеце – його історию, чудовы краєвиды, природу, забыткы і люди… А познаны нами місця вказуєме інчым. Представляме Низкій Бескід, Лемковину нашыма очами, на яку смотриме днес, але часто през призму давных часів. І як раз о тым хочеме Вам оповісти – о вандрівці, познаню, о вынятковым місци».

Нашы гості од більше як шестьох років одкрывают і документуют особливы місця в Низкым Бескіді. Походят они з околиц Ґорлиц і хоц не мают лемківскых корени, то Лемковина є ім барз близка. Веце про них і про результаты іх роботы можете чытати на страні: http://lemkowyna.blogspot.com/

Стріча пройде 10. лютого/фебруара о 17:00 год. в Рускій Бурсі (ул. Сєнкєвіча 28) в Ґорлицях і буде ведена в польскым языку.