Европа Карпат тым разом в Реґєтові

В суботу, 19. червця/юнія, в Реґетові, коло Устя Руского прошла 29. Медженародна Конференция «Европа Карпат». Орґанізатором стрічы, котра прошла як телеконференция, был ведучый Комісиі Заграничных Справ Марек Кухціньскій та ведуча Делеґациі Сойму і Сенату до Парляментарного Згромаджыня Орґанізациі Безпекы і Спілпрацы в Европі (ОБСЕ) Барбара Бартусь.

В відеоконференциі взяли участ політикы, науковці та самоурядовці з держав карпатского реґіону, якы омовили квестиі тыкаючы будучности Европы, польского лідерства в ОБСЕ. Присутны на стрічы бесідували тіж на тему рільництва, туристикы, Зеленого Курсу ци квестиі звязаны зо середовиском Карпат ци Карпатской Стратеґіі, котра в іх опініі єст шансом на розвиток Підкарпатя і Малопольщы.

Основом Карпатской Стратеґіі сут штырі головны обшыри діяня: чыста індустрия, зрівноважена туристика, в тым особлива підпора сельской, здравотной і екотуристикы, розвиток карпатскых клястрів та екосистем інновациі. Важным пунктом в Стратеґіі єст промоция реґіональных продуктів м.ін. через вводжыня спільного карпатского ознакуваня продуктів. В часі творіня Стратеґіі особливый натиск кладено на охорону середовиска. Бесіда о передуманым ґаздуваню натуральныма засобами, охороні ґатунків ци творіню трансграничных, еколоґічных корытарів для дикой звірины.

Цикль конференций «Европа Карпат» был започаткуваный в 2010 р. Сесиі одбывают ся реґулярні, проходили уж м.ін. в Креници, Перемышли ци Красічыні. Становлят форум выміны поглядів і думок, тыкаючых діянь для розвитку не лем Карпат, але тіж обшыри Триморя і Серединно-Східньой Европы.

Фот. twitter.com/KancelariaSejmu