Фанпейдж порталю і радия ЛЕМ.ФМ – забльокуваний!!!

Днес, 18. вересня (септембра) 2015 р., около 12.00 год. спостерегли сме проблемы в фунґуваню фапейджа порталю lem.fm на социяльній сіти Фейсбук. Не діє опция шеруваня постів, котры ся на ним являют, вказуючы комунікат: “В пості находит ся зміст, котрий остал забльокуваний нашыма системами безпекы”. Очывидні, комунікат дає змогу выслати опінію, же то даяка хыба, але нич не прийде одповід од адміністраторів Фейсбука, не сме в силі пояснити, яка єст того причына.

Не думаме, жебы фейсбуковы альґоритмы могли детальні розознати ся, што пишеме в нашых статях, котры пак шеруєме, зачынаючы од фанпейджа радия і порталю лем.фм. Тепер забльокувана єст більшіст функций. Чудує нас тото, же мудры системы безпекы Фесйбука находят контроверсиний зміст напр. в інформациях о Русинах з ЗША, котры крутят документальний фільм о Акциі «Вісла», або о выставі ікон в Музею Никыфора.

Уж деякій час социяльна сіт Фейсбук дає змогу реаґувати на проявы нетолеранциі, ксенофобіі, расизму, спераня заказаных в вельох державах світа тоталітаризмів, фашызму, комунізму, або писаня постів, котры ображают другых. Сам Фейсбук не бльокує змісту, але дал таку змогу своім хоснувателям, зато тепер каждий може зголосити контроверсийны подля нього відомости, находячы ся в буд-якій ґрупі, таблици, ци фанпейджы Фейсбука. За нашым приміром видно, же окрем позитывных аспектів той функциі, контроверсийным змістом для інтернетовых тролів, котрий мусят провірити адміністраторы і до того часу забльокувати фанпейдж, сут інформациі о выставі ікон, освободжыня Калинова од фашыстів, або вказуваня комуністычного злочыну Акциі «Вісла».

Нашым пізріньом, то заплянувана акция інтернетовых пакістників, котра, з причыны неможности противдіяня інчыма доступныма каналами, замірена єст на борбу з могучым та шыроко любленым, слуханым і чытаным, будучым по понад штырьох роках діяльности великом медияльном ґрупом – проєктом ЛЕМ.ФМ, в котрым находят ся: єдине во світі жыве лемківскє інтернетове радийо і інформацийний порталь. Хочеме спомнути, же наша ініциятыва єст бодай першом в істориі Русинів, котра выходит далеко поза обшыр лем єдного реґіону Карпатской Руси, обнимаючы єй як ціліст, притігаючы постійных прихыльників, слухачів, чытачів робітників і спілробітників зо вшыткых русиньскых територий, так історычных, як і сучасных, звязаных з еміґрациями. Як ся тепер вказує – не вшыткым ся тото любит.

До пакістників встигли сме уж привыкнути. Неєден ксенофобічний впис против лем.фм на Фейсбуку лишыли сме без кліканя і кликаня о поміч адміністраторів, надіючы ся на тото, же шыроко понята свобода слова, хоц оны вписы часто ся не кваліфікували, жебы іх так назвати, єст найбільшым, сотвореным і выходячым з демокрациі, хосном. До інвіґіляций традийныма каналами – тіж (напр. візиты Службы Безпекы Украіны в готельовых покоях редакторів лем.фм).

Нич діждеме ся од Фейсбука вказаня, котры выражыня і слова нашых статій погнівали іх систем безпекы, мусиме сой давати раду без него. І вы можете нам помочы, прібуючы шерувати буд-якій впис з нашого фанпейджа на свою таблицю, што найперше буде забльокуване системом безпекы, але клікяючы на опцию переданя свойой опініі, пишучы, же то хыба, споможете не лем нас, але тіж Фейсбук, жебы ідентифікувал інтернетовых тролів.

За поміч і зрозумліня – ДЯКУЄМЕ!