Фестіваль сакральной музыкы в церкви в Брунарах

Oд найблизшой неділі до вітірка 15.08 в брунарскій церкви буде мож стрітити ся з оперовыма музыками, почути звукы фортепіянового тріа, гушель, аж і бандуры. Вшытко за справом Музычных Стріч з Сакрум. Артистичний патронат над подійом мат проф. Тереса Жыліс-Ґара.

Сакральна музыка і получений з ньом спів єст особливом формом контакту з Творительом – бесідує о. Юзеф Бонк, парох парохіі Пресвятой Богородиці в Брунарах, орґанізатор подіі. – Хочеме через нашы Музычны Стрічы почути тото, што бесідує до нас Бог, а при тым почути себе взаімно. Колиси на нашых землях попри собі жыли католикы, православны, грекокатоликы і євреі. Творили спільноту. Розуміли ся, шанували і помагали собі. Разом ся вчыли, піднимали спільны діяня і творили медже собом реляциі, оперты на взаімній толеранциі. Через Музычны Стрічы вертаме до заслуженых карт істориі нашой малой Отчызны, красного спілзвучыня ріжных віроісповідань, до потребы взаімного пересіканя ся богатством культур – заохочат священник.

Вчас концертів буде мож почути творы Баха, Генделя, Монюшкы, Вебера ци Рахманінова. Выступлят Ільона Кжывіцка, Ярина Кузмич, Тарас Кузмич, Лавра Клювак-Соболевска, Анна Зюлковска і Моніка Барановска. Детальний проґрам поміщаме в ориґіналі пониже.

Музычным Стрічам товаришыт выстава акварелі і фотоґрафіі Станіслава Гібнера, артисты звязаного в Низкым Бескідом, та выстава народной штукы. Презентуваны будут ручной роботы свічы, выробы з бібулы та різбы авторства Барбары Короны, Яніны Мруз, Романа Бєльского та Марияна Мулкы.

Орґанізаторами Музычных Стріч сут парохія Пресвятой Богородиці в Брунарах, о. Юзеф Бонк, Марек Мічульскі Вокс Гумана в Креници.

Брунарска церков св. Михала Архангела єст приміром выдатной лемківской деревяной архітектуры. Датувана єст на 1797 рік. Перед штырьома роками была вписана на Листу Світовой Спадковины ЮНЕСКО. Находит ся тіж на Пути Деревяной Архітектуры в Малопольщы.

Festiwal Muzyki Sakralnej