FM

Крайова Рада Радийофоніі і Телевізиі (KRRiTv) – польскій уряд, котрий занимат ся реґуляциями і діліньом концесий на емісию радийовых і телевізиных сиґналів зо стацийонарных высылачів, на засіданю 29. червця/юлия 2016 р. приділила концесию Стоваришыню Руска Бурса в Ґорлицях.

Од 2011 р. ґорлицкє стоваришыня намагало ся дістати можливіст пошырюваня лемківского змісту і слова в русиньскым языку не лем в інтерентовым стрімі, але і хоснуючы розсівчу сіт своіх власных высылачів на ультракороткых волнах. В 2012 р. презес Уряду Електронічной Комунікациі (UKE) інформувал, што в закрисленій в бурясным прошыню териториі мож найти дві потрібны фрекфенциі, котры дозволят сіяти сиґнал з высылача, поміщеного на Лемковині на обшыр ґорлицкого та сусідных повітів, а з высылача в Польковицях на повіты – польковицкій, ґлоґівскій, любіньскій та частично ліґницкій, новосільскій, жаґаньскій і сусідні. В тым часі уряд UKE вюл неґоцияциі зо словацкым, німецкым і чешскым одповідніма урядями цілю принятя медженародовой догваркы в справі наданя такых фрекфенций, якы не будут взаімно ся колотити. По закінчыню того етапу Крайова Рада Радийофоніі і Телевізиі 11. січня/януара 2016 р. оголосила отворений для вшыткых медий конкурс на проґрам презначений для лемківской соспільности. В позві окрислено, што концесия мат быти приділена на розповсяджуваня радийового універсального проґраму, т.є. сопоставленого з вшелеякых жанрів і радийовых родів з ріжном проблематиком, в тым порушуючом локальны темы на обшыри высыланя. Проґрамы мают быти презначены для лемківской етнічной меншыны (русиньской, бездержавной нациі) в русиньскым языку. Емісия має проходити безперерывно цілу добу і означена названьом окрисленом в концесиі.

До остаточных змагань о концесию приступили – фірма з Коросна – Trendy Media, і Стоваришыня Руска Бурса. На середовым засіданю рада (KRRiTv) за найліпший признала проєкт представлений Руском Бурсом, та на найблизшых десят років йому дала концесию на высыланя з высылачів в Польковицях, на фрекфенциі 103,8 MHz і в Ґорлицях на фрекфенциі 106,6 MHz.

Про точний початок высыланя проґраму радия ЛЕМ.фм на ультракорoткых волнах будеме інформувати.