Ґалля віцеведучым соймовой меншыновой комісиі

В листопаді/новембрі 2019 р. інформували сме о факті покликаня Соймом Польской Республикы на наступну каденцию єдной зо своіх постійных комісий – Комісиі Нацийональных і Етнічных Меншын. На розділ од інчой – Спільной Комісиі Уряду та Нацийональных і Етнічных Mеншын, тота складат ся выклучно з посланців.

По схваліню складу комісия зачала свою формальну роботу. Од долшого часу знаный єст уж поділ становиск в єй президиі, але меншынового посланця выбрано аж тепер. Єдным з віцеведучых остал посол Ришард Ґалля, котрый репрезентує німецку меншыну. Єст він тым самым єдиным меншыновым посланцьом.

Продолжыня

Ришард Ґалля на функцию віцевечудого комісиі был выбраный уж дальшый раз. Становиско тото тримат од 2007 р., а посланцьом німецкой меншыны єст од 2005 р., походит з Опольщыны.

За його номінацийом в каденциі 2019-2023 голосувало осмеро членів комісиі, єден был проти, а шестеро стримало ся од голосу. Посол был выбраный в додатковым голосуваню, понеже коли на початку каденциі, внет по выбраню комісиі, были ділены становиска, для Ґаллі бракло функциі віцеведучого. Бракло меджепартийного договору.

Кандидатуру Ґаллі зголосил посол Гражданьской Коаліциі Евґеніюш Чыквін, в попередніх каденциях посол Союзу Демократичной Лівиці. Чыквін то діяч православной соспільности і білоруской меншыны. «Выбір мойой особы на тото становиско єст одданьом пошаны вшыткым жыючым в Польщы нацийональным меншынам. (…) Меншыновы середовиска потрібуют векшой підпоры для підтримуваня культоровой і языковой достоменности. Вшыткы меншыны – уж по выборі – выслали до ня через соспільны медия сиґналы, што є пильна потреба модифікациі іх пріоритетів», повіл про порталь www.nto.pl Ришард Ґалля.

Стояня на меншыновых позициях

Задачом соймовой Комісиі Нацийональных і Етнічных Меншын є занимати ся справами звязаныма з підтримуваньом культуровой спадковины нацийональных і етнічных меншын, якы сут вызнаны польскым законодавством. В єй складі в ІХ каденциі Сойму находит ся 17 посланців. Ведучом єст Ванда Новіцка з Лівиці. Віцевучыма комісиі, окрем Ґаллі, сут Збіґнєв Конвіньскій з Гражданьской Коаліциі і Войцєх Зубовскій з партиі Право і Справедливіст.

Найважнійшым успіхом КНіЕМ по 1989 р. было принятя в 2005 р. уставы о нацийональных і етнічных меншынах та о реґіональным языку, котра списала правны реґуляциі тыкаючы статусу меншын в Польщы. Як інформивал Ґалля, перед парома роками была зрыхтувана, при шырокых меншыновы консультациях, пропозиция новелізациі закону. Устава о новелізациі перешла цілу парляментарну процедуру і конец-кіньцом не была підписана президентом.

Соймова Комісия Нацийональных і Етнічных Меншын то окрема комісия од Спільной Комісиі Уряду та Нацийональных і Етнічных Меншын, яка діє на основі спомянутой уставы з 2005 р. В склад СКУтНіЕМ входят представникы уряду влады і репрезентанты поєдных нацийональных і етнічных меншын. На лемківску етнічну меншыну припадают в ній два місця.