«Гарасимович в Никыфора» – выстава

Округовий Музей в Новым Санчы сердечні просит до обзераня выставы Гарасимович в Никыфора, орґанізуваной разом з Публичном Бібліотеком в Кракові.

Вернісаж выставы буде проходил 17. жолтня/октобра (субота) т.р. о 12.00 год. в Музею Никыфора в Креници. Выстава потырват до 15. лютого 2016 рока.

Єжы Гарасимович (1933-1999) – польскій поета, основатель поетыцкых ґруп Мушына і Барбарус. В 1971 році отримал Нагороду Фундациі ім. Косцєльскых. Дебютувал в 1955 році в «Літерацкым Жытю». В своіх творах натуральні лучыл зо собом елементы реального світа, штоденной реальности та фантастыкы, народного выображыня, оповідань. Єден з критыків назвал го головным представником позезиі візий – фантазиюваня, кольоровой, полной образів імаґінациі.

Серед головных тем творчости нашла ся природа полудньовой Польщы і Лемковина, до котрой часто приізджал і вертал. Была його мітычном краіном лагідности (єст автором того окрисліня). Його творы часто ставали ся інспірацийом для творців з тзв. кругу співаной поезиі – музыків краіны лагідности. Окрем однесінь до лемківской культуры, в його вершах мож найти фольклор великомістецкых периферий, елементы середвічной ци бароковой культур. Был барз плідным творцьом – лишыл по собі аж 56 збірників вершів.

Є. Гарасимович особисто знал Никыфора і міцно цінил сой його творчіст. Посвятил му тіж пару вершів. Літерацкы критыкы вказуют на аналоґіі в способі артистычного виджыня світя през обох творців. Выстава в Музею Никыфора то перша, так близка стріча Епифана Дровняка з Єжым Гарасимовичом.

фот. wikipedia.pl