Голос од родаків з Америкы – пікнік в Йонкерсі при спекоті

В неділю, 1. липця/юлия 2018 р., Карпаторусиньскій Центр «Лемко Голь» орґанізувал шторічний Лемківскій Пікнік. Як сме заявляли перше, подія традицийно мала бы проходити на Русаля, але од парох років орґанізаторы не мают змогы робити пікнік як раз товды, коли свята проходят.

На подію завитали родакы предовшыткым з Йонкерсу і околичных місцевости. Пришли тіж Лемкы з найбільшого міста ЗША, Ню Йорку. Лемківскій Пікнік зачал ся од привитаня орґанізаторами. Присутны мали змогу коштувати розмаітых страв. Подія проходила в лісным обєкті, находячым ся в селі Гартсдейль недалеко Йонкерсу.

Пришли представникы старшого поколіня, котры часто родили ся іщы на Лемковині, і споминали про стары часы. Самособом, част з тых люди то діячы старого Лемко Голю, котрий был не лем великом орґанізацийом, але і місцьом, будівльом в Йонкерсі, в якій проходили вшелеякы ініциятивы присвячены культурі Лемків. Лемко Голь за причыном планной фінансовой ситуациі і зменшаня ся чысла членів мусіл быти в 90. роках ХХ ст. проданий. Од парох років тырват його реактивация, за котру взяла ся молодша ґенерация діячів. Іх цілю є притягнути як найбільше чысло молодых, штобы плекати серед них лемківску культуру.

Андрий Медвідь, родак зо Ждыні, якій вєдно з другыма активістами Лемко Голю занял ся продолжаньом традициі лемківскых пікніків, поздоровил радийо ЛЕМ.фм, котрого є великым любительом.

Пікнік проходил при великій спекоті. По інчы рокы участникы брали ся за гру в волейболь, але тым разом не было вельох охочых. Нашли ся і такы, котры перетримали высоку температуру і розограли меч. Пікнік был нагодом, жебы познати новых люди і підтримати дотепернішні односины медже лемківском еміґрацийом на східніх окраях ЗША. Наконец, была знята ґрупова фотоґрафія, а пак спільні співано лемківскы пісні.

Йонкерс і його околиці, находячы ся в штаті Ню Йорк, то доднес значуче скуписко лемківской еміґрациі. Ту на переломі XIX і ХХ ст. родила ся русиньска діяльніст серед товдышньой інтеліґениці. Топонім Йонкерс в Старым Краю тямит ся з Американьскым Карпаторускым Центром, з котрым повязаний был долгы рокы і Симеон Пыж, особа, котра в меморандум до уряду Польской Народной Республикы постулювала дозволити Лемкам вернути на рідны землі, дати ім можніст вчыти діти в рідным языку і реліґійну свободу.

В 1936 р. до Ню Йорку была перенесена редакция ґазеты «Лемко», котра початково находила ся в Клівленд, в штаті Огайо. Наконец редакция нашла місце працы в русиньскій інституциі культуры в Йонкерс. Там находила ся і печатня Лемко Союза, котра выдавала не лем ґазету, але і інчы выданя. В Йонкерс і околичных місцевостях доднес находит ся вельо православных та грекокатолицкых храмів, до котрых приналежат потомны Русинів з цілой Карпатской Руси, але точно серед них сут потомны еміґрантів з Лемковины. Прото Йонкерс од все тямит ся з міцным осередком лемківской політичной і культурной інтеліґениці в ЗША.

фот. Мирослав Лабуда