Ґрекокатолицькы єпіскопи з Мадярьска і Словакії вєдно засідали в Маріяповчі

Як інформовав Пресовый центер Кошыцькой єпархії, ґрекокатолицькы єрархы із Мадярьска 19-го марца 2025-го року стрітили ся в Маріяповчі, жебы вєдно з єпіскопами із Словакії засідали на Раді єрархів, і одсвятковали тым 10-ту річніцю зряджіня митрополії.

Вечур заповнили базиліку в Маріяповчі віруючі і священици на Літурґії оперед посвяченых дарів, на котрій брали участь і єпіскопи.

Десять років митрополії

Перед десятьома роками, 19-го марца 2015-го року, Папа римскый Франціск основав Ґрекокатолицьку митрополію в Мадярьску. Головны святкованя мають одбыти ся в авґусті почас великого одпусту в Маріяповчі. Маріяповч є єдным із найвызначнішых історічных одпустовых місць ґрекокатоликів русиньской традіції.

З нагоды річніці в день зряджіня митрополії стрітили ся єрархы на міморяднім засіданю Рады єрархів – верьховного орґану митрополітной церькви, на котрім брали участь і представителі Ґрекокатолицькой церькви на Словакії. Діскутовали о важных вопросах, котры дотуляють ся обидвох церьквей.

„Обидві церькви собі суть барз близкы. Ґрекокатолици на Словакії стали окремов митрополійов о сім років скоріше, значіть, выміна скушеностей при формованю новых пасторачных і теолоґічных приступів была барз хосенна. Окрім ґеоґрафічной близкости нас капчають і історічны коріня, і актуалны соціалны выкликы, котры выжадують собі сполочный поступ,“ повів отець Іштван Шестак, протосінкел Гайдудороґской архієпархії.

Літурґічны тексты і жывот священиків

Дополідне діскутовало ся о хоснованю літурґічных текстів і публікацій при удільованю ініціачных тайн, як і о односинах межі причащаньом дітей і першым святым причастьом. Пополідне єпіскопи діскутовали о вопросах, якы дотуляють ся священьского жывота – їх молитвового рітма, формації семінарістів, літурґічной освіты священиків і віруючіх, як і о далшых темах.

На сполочнім засіданю за мадярьку сторону брали участь Высокопреосвященый Філіп Кочіш – архієпіскоп і митрополіта гадудороґскый, Преосвященый Атаназ Орос – єпарха мішколцьскый, і Преосвященый Авел Сочка – єпарха ніредьгазьскый.

Із Словакії пришли Высокопреосвященый Йона Максим – архієпіскоп і митрополіта пряшівскый, архієпіскоп Кіріл Василь – кошыцькый єпарха, і Преосвященый Мілан Лах – помічный єпіскоп Братіславской єпархії.

Завершіньом дня была вечур Літурґія оперед посвяченых дарів, в рамках котрой єпіскопи з Мадярьска і Словакії вєдно подяковали за десять років митрополії в Мадярьску.

Высокопреосвященый Філіп припомянув Ужгородьску унію

На літурґії тримав проповідь Высокопреосвященый Філіп, голова Ґрекокатолицькой церькви в Мадярьску. Владыка вказав на то, же в історічнім контексті десять років може здати ся як довгый період, але в порівнаню з 379 роками од Ужгородьской унії із 1646-го року то лем куртый момент.

І кедь на тій події не быв участный ани мукачовскый єпарха Теодор Мацапула, ани помічный єпіскоп мукачовскый Ніл Лущак, владыкове загнали митрополітови Філіпови з нагоды юбілея основаня митрополії поздравне писмо.

Кір Філіп так само припомянув ключовы історічны дії, котры формовали тамтешню Ґрекокатолицьку церьков, котра є наслідником Ужгородьской унії і Мукачовской єпархії. Владыка припомянув перше слызыня іконы Богородіці в Маріяповчі в 1696-ім році, велике згромаджіня в Гайдудорозі в році 1868, путь до Рима в році 1900, коли пятьсто мадярьскых ґрекокатоликів принесло свої пожадавкы прямо Вселеньскому Архієрейови ці основаня Гадудороґской єпархії у 1912-ім році. Ку тым історічным меджам теперь належыть і основаня митрополії в році 2015.

На кінцю кір Філіп припомянув, же ікона Богородіці в Маріяповчі є сімболом єдности ґрекокатоликів без огляду на граніці.