Ґрекокатолцька церьков на Словакії помагать біженцям. Православна церьков вызвала на молитву і піст

Помічну руку при міґрачній крізі на словацько-україньскій граніці подавать войновым біженцям і Ґрекокатолицька церьков на Словакії.

Прямо на гранічных переходах у Вышнім Німецькім, в Ублі і у Великых Слеменцях помагають богословы з Духовной семінарії блаженого єпіскопа Павла Петра Ґойдіча в Пряшові, священици і віруючі з пригранічных парохій, але і Ґрекокатолицька харіта Пряшів. Інформовав о тім говорця Пряшівской архієпархії Михал Павлишіновіч.

Є то емотівне, торгать то сердце

До Вышнього Німецького были подарованы із семінарії декы і понад 500 антіґеновых тестів на коронавірус. Семінарісты черяють ся в 12-годиновых інтервалах почас дня і ночі. Давають біженцям інформації, де можуть іти, подавають теплый час, помагають тестовати.

„Люди втікаючі перед войнов на Україні переходять граніці із слызами в очах, то барз емотівне, торгать то сердце. Нашы семінарісты ім можуть быти близко нелем фізічнов, але і духовнов старостливостьов,“ повів о сітуації шпірітуал семінарії Марек Калята.

Як інформовав Павлишіновіч, орґанізована є уж і поміч од скавтів а віруючіх Братіславской єпархії.

З гранічного переходу Убля – Малый Березный біженців возять до села Убля, до тілоцвічні в школі. На тім гранічнім переході поміч кооперує село Убля з Ґрекокатолицькым парохіалным урядом в Ублі, велика поміч є і од Ґрекокатолькой харіты Пряшів а Спішской дієцезной харіты.

Справця убляньской ґрекокатолицькой парохії Ян Павловскый інформовав, же суть одкрыты про будьяку добровольницьку поміч.

Різны збіркы выголошують о окремы ґрекокатолицькы парохії по цілій Словакії.

Православны суть приготовлены помагати

„Діяня на Україні в остатніх днях слідуєме з болістьов і жальом. Свою глубоку емпатію з терплячіма, співчутя выражаме вшыткым, котрых прямо або непрямо засягли воєньскы операції. Подля можностей сьме приготовлены помагати всядыль там, де буде треба,“ пише ся у Выголошіню Священого сіноду Православной церькви в чеськых землях і в Словакії, котре было выдане 25-го фебруара.

„Хочеме надіяти ся, же історічны і духовны повязаня меджі Українов і Російов поможуть участным сторонам вырішыти выникнутый конфлікт не насилством, бойовым пустошіньом і безсмыселныма стратами на людьскых жывотах, але якраз наопак – намагами о мір а приготовленостьов їднати і глядати приятельны выходы.

Просиме вшыткых духовных і віруючіх Православной церькви в чеськых землях і в Словакії о окремый піст і молитвы за мір на Україні,“ закончує сінод своє выголошіня.

Уж теперь з конкретнов помочов приходить наприклад Православна церьковна общіна в Меджілабірцях, котра выголосила збірку матеріалной і фінанчной помочі.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА