Грошы на турістічный рух і до русиньскых реґіонів

Пряшівскый самосправный край підписав рамках проґраму черезгранічной співпраці Interreg V-A далшых 17 мікропороєктів. Суть реалізованы в партнерстві із здружіньом Карпатьскый еврореґіон.

В краю ся проінвестує понад 600 тісяч евр, головно на актівности в турістічнім русі. Грошы підуть і до русиньскых реґіонів.

Проєкты приношають бенефіты

17 проєктів, як інформовала аґентуру TASR Даша Єленьова, говоркыня Пряшівского самосправного краю, ся зачінать реалізовати на теріторії краю і Підкарпатьского воєводства на польскім боці граніці вдяка партнерству із здружіньом Карпатьскый еврореґіон. Цілково сума, котра піде на актівности із средств Европского фонду реґіоналного розвитку, є понад 1,5 міліона евр. На теріторію Пряшівского краю іде 603 тісяч.

„Проґрамы черезгранічной співпраці Польщі і Словакії в минулім і актуалнім проґрамовачім періоді принесли і все приношають нашому краю много бенефітів. Реалізують ся великы інвестічны акції в транспорті, інфраштруктурі, турістічнім русі, освіті, но і незраховательне множество меншых ініціатів, котры нияк не хочеме підціньовати. Як раз мікропроєкты, коло котрых маєме на старости приготовліня, схвалюючі, оцінюючі і контрольны процесы, суть того прикладом,“ повів председа Прюшівского самосправного краю Мілан Маєрьскый.

Грошы і до русиньскых реґіонів

Успішныма жадателями є веце субєктів, головно міста і села, но і орґанізації з области турізма. Мікропроєкты суть заміряны в першім ряді на іноватівны формы пропаґації черезгранічной теріторії, а і далшы актівности в области турістічного руху і културы.

Схвалены были і проєкты, котры будуть реалізовати ся на теріторіях з русиньскым населіньом. В Меджілабірцях ся із приділеных грошей будуть реконштруовати тяжкы збрані з Другой світовой войны включно танку Т-24. В околіці Снины будуть присвячати ся дітям і молодежи формов курзів в природі. Підпореный быв і турізм, котрый дотулять ся астрономії, конкретно в селах Колоніця в окресі Снина і в Розтоках, свідницького окресу. Грошы дістане і проєкт значкы Карпатьске небо, котрый людям представить і історічно менше знаму теріторію Вовчі горы, яка находить ся в Народнім парку Полонины.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА