Ґрупа приятелів меншын розшырює свою діялность

Ґрупа приятелів меншын (Skupina priateľov menšín, SPMN) в Народній раді Словацькой републікы розшырює свою діялность о меджінародну співпрацу із Асоціаційов про баданя народностей (Association for the Study of Nationalities, ASN).

Нова співпраца має забезпечіти якостнішу словацьку леґіслатіву. Аґентуру TASR о тім інформовав єден із основателів ґрупы, бывшый уповномоченый про ромскы комуніты Абел Равас.

Ґрупа приятелів меншын конштатує, же з причіны абсенції меншыновой партії в парламенті бракує фаховый погляд на леґіслатівны пропозіції з боку меншын. „SPMN мы основали з цільом укріпіня якости творіня законів з досягом на меншыны. Залучіньом меджінародной сіті ASN до той співпраці знаме нашы рады і аналізы розшырити о меджінародну добру практіку і іншпіровати діскусію на Словакії з найліпшыма ідеями з остатніх частей світа,“ конштатує Равас.

Фаховці із SPMN і ASN подля нього в рамках співпраці продіскутують веце ключовых тем в области меншыновых прав.

Перша діскусія проходила в середу 7-го септембра 2022-го року в Братіславі, участный на ній быв презідент асоціації Флоріан Бібер. Фаховці бісідовали о темах признаня меншын, меншыновій репрезентації і демократізації меншын.

„ASN вже довгы рокы має намагу маповати сітуацію в области меншыновых прав, но теперь першыраз залучіме ся до оціньованя леґіслатівного процесу шпеціфічной країны. То про нас інтересный моделовый проєкт, котрый, вірую, буде мати хосен і про шыршу сполочность,“ повів Бібер.

Актівіту Ґрупы приятелів меншын вітать і уповномоченый влады Словацькой републікы про народностны меншыны Ласло Буковскый. „Тішу ся, же посередництвом співпраці з ASN і на Словакію дістануть ся ідеї, котры рушають з меншыновов політіков по цілім світі,“ высловив ся уповномоченый.

Цільом Ґрупы приятелів меншын є перепаяти фаховців у области меншыновых прав із депутатами Народной рады Словацькой републікы. За веце як рік од свого выникнутя ґрупа вже припомінковала понад штиридцять законів із досягом на жывот народностных меншын на Словакії.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА