Ґустав Малер был єдным з найзнаменитшых дириґентів свого часу, вюл передовы оркєстры в Европі і Зъєднаных Штатах Америкы. Як композитора ставляют го серед тых найвыдатнійшых періоду пізного романтизму. Занимал ся лем симфонічном музиком і пісньом.
Ґустав Малер вродил ся в 1860 році в жыдівскій родині в місцевости Каліште на обшыри днешніх Чех. Был барз талановитым дзецком. На 15 років пішол до віденьской консерваториі. Як лем скінчыл 20 років зачал робити карєру як дириґент і кєрівник оперы. Зреформувал орґанізацию оперы, што было причынком до модерных оперовых інсценізаций.
Творчіст Малера є уформувана через контраст медже тымчасовістю а надприродністю, медже земным світом чутя а духовым. Зміны в стилях ци іронічны алюзиі бурили границі медже ХІХ а ХХ ст. Скомпонувал 10 симфоній, 4 циклі сольовых пісні з оркєстром і кантату.
В своіх симфоніях і піснях Малер робил синтезу, в рамках симфонічной оркєстры лучыл ріжны типы та жанры музикы: інструментальну з вокальном, тип оркєстровый з камеральным, симфонію з пісньом і кантатом. Выпрацувал міцно зіндивідуалізуваный стиль.
В проґрамі будете мочы выслухати симфонію но 5 Ц мінор, пару пісен та творы од інчых клясиків.
Коментарі