Гуцулы на Лемковині

О нецілий тыжден, 16.-18. вересня/септембра т.р., в Реґєтові Нижнім на Лемковині буде мож взяти участ в XXII Днях Гуцульского Коня. То Загальнопольскій Чемпіонат Коня Гуцульской Расы до Хованя і Хоснуваня (орґ. Ogólnopolski Czempionat Hodowlany i Użytkowy Koni Rasy Huculskiej). Тридньова подія притігат головні заінтересуваных того рода галузю ґаздівкы – хованьом конів, але тіж любителів конів і вшелеякых активности на конях, од туристикы через регабілітацию.

Через долгы рокы єден з важнійшых і більшых в Европі годовляных осередків той расы конів находил ся в поблизкым Ґладышові, але в 2001 р. Стаднину перенесено до сусіднього Реґєтова. Інчым знаным осередком, занимаючым ся тым коньом, был напр. Заклад Зоотехнікы в Одреховій. Гуцулы то примітивна раса гірскых конів, яка выводит ся з гуцульской части Карпат і то там до кінця XIX ст. головні зосереджала ся годовля. Перший раз гуцул споминаний в джерелах был уж в 1603 році. Гуцулы то невеликы, барз жывотны, сильны і тырвалы коні, а при тым лагідны і приязны для люди. Давнійше хоснувано тоты коні головні до транспортуваня тяжкых ладунків по вымагаючых гірскых путях, а тіж на ґаздівках напр. на Лемковині. Днес гуцулы переважні хоснує ся в рекреацийных і туристичных цілях, а вересньова подія, свято той расы конів, єст єдном з важнійшых в сезоні, бо получена єст з Загальнопольскым Чемпіонатом Коня Гуцульской Расы до Хованя і Хоснуваня. З той причыны в проґамі XXII Гуцульскых Днів находят ся одповідні пропозициі – конурсы в повожыню кінных запрягів, конкурсы дресуры, маратоны, кондицийны пробы, годовляны оціны, кінны показы, конкурсы скоків, а і додатковы атракциі, як выступы фольклорных капель і ансамблів, м.ін. лемківской ґрупы Надія, ярмак артефактів ручной роботы, показы загыбаючых професий і вельо інчых.

Гуцулы, а тіж іх опікуны зо Стаднины Гуцульскых Конів Ґладышів, сут лавреатами чысленных нагорід, погарів, грамот і медалів за выставы, показы і конкурсы. Особливым выріжніньом єст участ конів зо стаднины в знаных польскых фільмах нарп. Огньом і мечом, Варшавска Битва ци Давне переданя: Коли сонце было богом в режысериі Єжы Гофмана. Реґєтівскы гуцулы мож было видіти тіж в фільмі Кво вадіс (Quo vadis) Єжы Кавалеровича, напр. коли тягнули колесницю з Ліґійом.