Гектор Берліоз, «З повагом», просит Павел Малецкій – неділя, 20.00 год.

Гектор Берліоз то выдатный музик, критик, публициста, творця романтичной симфоніі. Його творчіст вызначыла напрям розвитку симфонічной музикы на цілым світі. Камаратювал з Лістом, писал музику на сольовы выступы Паґаніні, іздил до Італиі, Німец, Росиі, Анґлиі.

Французскій композитор был істо космополітом і єдным з найбарже інтересуючых артистів епохы романтизму, початок котрой вызначат выконаня його найзнаменитшого твору – «Фантастичной Симфоніі». В 1826 році лишыл медичны студиі і поступил в консерваторию в Парижы. Для дополніня студий поіхал до Італиі. Коли вернул до Франциі, діял як критик і есеіста. В фельєтонах представлял своі естетичны погляды, головні про ролю літературного проґраму з музиці. В 1839 році остал консерватором бібліотекы, пак професором композициі в парижскій консерваториі.

В своій творчости Берліоз піднял жанр проґрамовой симфоніі, а заєдно был творцьом нового єй типу, котрый стал ся основом для розвитку симфонічной поемы. В головный твір, «Фантастичній Симфоніі», ввюл першый раз в симфонічній музиці головный мотив, тзв. idée fixe. Єст тіж Берліоз творцьом драматичной симфоніі, навязуючой до вокально-інструментальной симфоніі започаткуваной Бетховеном. Был выдатным новатором в обшыри вводжыня інструментациі.

В проґрамі почуєте найперше твір «Римскій карнавал» оп. 9 та, очывидні, найпопулярнійшу композицию Берліоза – «Фантастичну Симфонію». Будут і творы інчых клясиків.