Гіст в ЛЕМ.фм – Юстина Михаляк – середа, 11.00 год.

В середу, 8. червця/юнія тр., просиме выслухати бесіду з молодом Лемкыньом Юстином Михаляк з Ґладышова. Початок бесіды о 11.00 год.

Юстина Михаляк (вр. 2004 р.) є ученицьом третьой клясы І Загальноосвітнього Ліцею ім. М. Кромера в Ґорлицях. В остатнім часі остала лавреатком І нагороды 2. Літературного Конкурсу «Краса Малопольщы описана словом» в катеґориі Прозы написаной літературным языком в віковій ґрупі од 13 до 17 років. Oрґанізатором конкурсу был Малопольскій Центр Культуры «Сокіл» в Новым Санчы.

Робота, котром выграла конкурс, односит ся до істориі Лемків, хоц дає веце можливости інтерпретуваня. Слухайте інтервю, а дознате ся, одкале молода писменниця взяла інспірацию, ци вяже своє будуче з писаньом, а на конец бесіды авторка прочытат своє оповіданя.

Премєра інтервю в середу, 8. червця/юнія, о 11.00 год, повторіня в суботу, 11. червця/юнія, о 15.00 год., по премєрі проґрам найде ся в подкастах радия ЛЕМ.фм в тым місци.