«Голосы Русинів Підкарпатя» – середа, 18.10 год.

В днешнім выданю представиме вам першу часть інтервю з русиньскым актівістом і ці не єдным з наймолодшых русиньскых поетів і публіцістів Підкарпатя Мигальом Чикивдьом.

Побісідуєме о його актівній літературній і публіцістічній діятельности, так як непозераючі на свій юный вік автор вже стигнув выдати девять книжок, а три з них за послідній рік.

Ключовы темы інтервю:

• Дітиство русиньского зведавого дітвака
• Творчі початкы юного поета
• Книжкы і публікації Мигаля Чикивді

Мигаль Чикивдя народив ся 2-го юна 2000-го року у селі Березникы, што на Свалявщіні, Підкарпатя. Отець цілый жывот по зароботках, і мама робить учітельку в сельскій основній школі. А своє дітинство малый Мигаль провів з прабабков, котра і привила йому любов до «нашой» културы і бісіды. Першый стишок написав як 9-річный по україньскы, «бо де я в тот час міг знати, што я Русин і наша бісіда русиньска, родічі ниґда за жадны націоналны вопросы ани не поднимали розговоры, їм было не до того», – каже сам респондент.

У тінеджерьскім віці почав писати свої першы віршы по русиньскы, што дуже привітали і  учітелі в школі, і родина ся радовала. Вже занедовго, іщі до закінчіня середньой школы, быв выданый першый поетічный зборник Мигаля Чикивді під назвов Сад русиньской поезії (р. 2016). В тім самім році стає членом Свалявського районного Общества Підкарпатьскых Русинів. А у році 2017 вступив до Общества русиньскых писателів Закарпатя. Доробкы автора публікують в русиньскоязычных і україньскоязычных выданях Підкарпатя.

Повну середню освіту, а то єденадцять клас, здобыв в роднім селі. Наслідно в році 2017 пішов ся учіти за еколоґа до Дрогобича (Львівська область, Україна), де і штудує в сучасноти. При штудіях во вольнім часі любить сісти, почітати даяку добру русиньску книжку про іншпірацію.

«Пишу о тім, што ня оточує і видить ся важным моїй позорности, а іщі пишу о вшелиякых каждоденных проблемах і сітуаціях, в тім чіслі і русиньскый мотів так само не забываю», – так характерізує свою творчость сам поет.

В поетічнх зборниках юного поета, а тых є пять, представлена шырока тематічна палета: од інтімной лірікы через соціално-екзістанціалну, і аж до патріотічной лірікы.  До будучности автор ся планує оръєнтовати на веце сучасны мотівы, бо твердить, же треба іти з ногов в час, а по русиньскы мож писати на хоцыякы проблематікы, і він то хоче доказати. Наприклад, на соціалных сітях Мигаля Чикивді вже можеме почітати його русиньскы тексты на тему еколоґії.

Так само окрему увагу треба приділити публіцістічній діятельности Мигаля Чикивді. Тота ся переважно складать з унікатных етноґрафічных матеріалів, котры ся авторови подарило позберати в роднім селім і його околіцях.

Книжкы Мигаля Чикивді:

1. Сад русинськой поезії (р. 2016)
2. Співанка русинськой душі (р. 2017)
3. Запискы з Боржавськой долины (р. 2017)
4. Березникы у давнину. Исторія и етнокультура (р. 2018)
5. Русинська сатира – поезія (р. 2018)
6. Исторія віры Березникув (р. 2019)
7. Акро по-нашому (р. 2020)
8. Пудузятникы и промысел Довжанського округу (р. 2020)
9. Дарабчикы душі (р. 2020)

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА