«Голосы Русинів Підкарпатя» – середа, 18.10 год.

В днешнім выданю представиме вам першу часть інтервю з русиньскым публіцістом, журналістом, блоґером і знамым політолоґом з Підкарпатя Степаном Сікором.

Респондент ся поділить своїма поглядами на общый образ русинства на Підкарпатю в різных історічных епохах, аналізуючі його склад.

Ключовы темы інтервю:

• Русинство в жывоті Степана Сікоры і його родины
• Русиньскый рух на Підкарпатю за послідніх сто років
• Проблемы і перспектівы русинства на Підкарпатю в сучасноти

Степан Ілліч Сікора народив ся 24-го марца 1951-го року у селі Староє Давидково близко Мукачова на Підкарпатю. Середню освіту з здобыв в Перечині. Наслідно на высокошкольскы штудії пішов на Ужгородьску державну універзіту, на Катедру фізікы (рр. 1968 -1973).

По успішнім закінчіню штудій за професійов робив в Научно-бадательскім інштітуті в Ужгороді. Є кандідатом технічных наук. За совітьскых часів науковцьови приділили вызнаменаня Заслужений винахідник України.

На зачатку 2000-ых років быв ведучім одділіня внутрішньой політікы при Мукачівскій державній адміністрації. В роках 2002 – 2006 керовав выборчім штабом до Верьховной рады Україны народного депутата Віктора Балогы. Якраз в тот період свого жывота стрітив по першый раз ся з русиньскым рухом і познакомив ся з тогочасныма русиньскыма актівістами Підкарпатя.

Дале три рокы робив директора санаторії Перлина Карпат, пак вернув ся у державну службу як заступник головы Мукачівской державной адміністрації. В сучасности Степан Сікора є на пензії.

За 20 років журналістічной карьєры автор написав понад 500 публікацій на історічну, краєзнавчу ці політічну тематіку. Першы доробкы ся появили в пресі коли Степан Сікора почав робити як редактор в штотыжденній общественно-політічній україноязычній ґазеті Старий замок, котра ся публіковала у Мукачові од 1997-го до 2006-го року.

Бівше як 10 років веде свій властный блоґ. В році 2013 основав свій незалежный портал Фенікс-слово, де є шефредактором.  За чісленны публікації о історії родного Підкарпатя в році 2020 дістав Мукачівску містьску премію імени А. Духновіча в номінації Літературознательство і публіцістіка.

Слухайте «Голосы Русинів Підкарпатя» в середу 26-го мая 2021 р. о 18.10 год., або повторіня в суботу 29-го мая 2021 р. о 11.00 год. за русиньскым часом.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА