«Голосы Русинів Підкарпатя» – середа, 18.10 год.

В днешнім выданю представиме вам інтервю з русиньскым зачінаючім поетом з Підкарпатя Мигальом Станом.

Побісідуєме про появу русинства в його жывоті. А так само позвідаме ся нашого респондента о творчіх планах до будучности.

Ключовы темы інтервю:

• Жывотна путь Мигаля Стана
• Творчі початкы і іншпiрації зачінаючого поета
• Актуалный стан русиньского руху на Підкарпатю з погляду Мигаля Стана

Мигаль Стан народив ся 22-го юла 1990-го року у многодітній родині столяря у селі Уґля, што на Тячівщіні, Підкарпатя. Отець цілый жывот по заробітках, а мама дома за дітми і ґаздівством дозерала. А своє дітинство малый Мигаль провів у горах пасучі худобу і чітаючі вшыткы доступны бібліотечны книжкы, што і пробудило у ньому інтерес до літературы.

«Першый мій стишок быв фіґлярьскый і доста прімітівный по україньскы, написав єм го в семій класі,» з усміхом на твари споминать Мигаль.

Неповну середню освіту, а то девять клас, здобыв в Уґля-Мыравскій школі, далше закінчів 10-ту і 11-ту класу в Уґляньскій школі. Наслідно в році 2007 пішов ся учіти на екстерну форму у МКТЕК (Мукачовскый кооператівный обходно-економічный колідж, м. Мукачово) за спеціалностьов товарознатель-обходник.

В році 2016 став преможцьом-діпломантом у конкурзнім фестівалі поезії Яблуневий цвіт у Хусті. В році 2017 дістав ґрамоту «за актівну позіцію і патріотізм» од Тячівскої РДА (Районной державной адміністрації).

Быв модератором забавляючой локалпатріотічной ґрупы Підкарпатя «КАвІлЮєМ & FigLюєм» на сіті Facebook, котра на днешній день рахує бівше як 355 тісяч членів.

В русиньскім русі ся почав анґажовати послідніх пару років. «Розумлю, же русинство  было все, но я просто про то довго не знав,» коментує сітуацію респондент.

На днешній день в арзеналі зачінаючого поета є представлено приблизно 100 русиньскых стихів (із слов М. Стана). В році 2020 выбраны стихы з творчости Мигаля Стана были опублікованы в Алманахови днешньої русинської літературы. В скорій будучности планує выдати властну збірку віршів.

В сучасности глядаючі ліпшого жывота вымушеный ходити по світі на заробіткы.

Слухайте «Голосы Русинів Підкарпатя» в середу 11-го авґуста 2021 р. о 18.10 год., або повторіня в суботу 14-го авґуста 2021 р. о 11.00 год. за русиньскым часом.