«Голосы Русинів Підкарпатя» – середа, 18.10 год.

В днешнім выданю представиме вам інтервю з русиньсков зачінаючов писательков з Підкарпатя Наталійов Сідларь-Дубовов, котра понад десять років жыє на северовыході Україны в місті Харків.

Побісідуєме о ролі русинтсва в єй жывоті, а так само будеме звідати ся о творчіх планах до будучности. Окрем того пані Наталія поділить ся з нами своїма внутрішніма пережыванями, думками, почутями, котры зажыла за послідных сім місяців в наслідку російской збройной аґресії проти Україны.

“Я дуже хочу, абы наша челядь не забывала про нас, і нам помагала. Україна має выжыти і перемогти. Мы, їй гражданы, маєме быти вольныма людьми, де бы мы не жыли.”

Ключовы темы інтервю:

• Творчі початкы і іншпiрації зачінаючой писателькы
• Декламація выбраных стихів авторкы
• О войновім Харкові і добровольницькой діятельности (із скушености Н. Сідларь-Дубової)

Наталія Григорівна Сідларь-Дубова народила ся 4-го апріля 1976-го року у Виноградові, Підкарпатя. Має глубокы русиньскы коріня по маминій лінії в селі Осій, што на Іршавщіні, далека родина Івана Петровція і Федора Потушняка (із слов респонденткы).

Повну середню освіту, а то єденадцять клас, здобыла в роднім місті. Проявляла ся як актівна, ініціатівна штудентка, брала участь на різных літературных конкурзах. Од дітинства горіла інтересом до книжок і чітала іщі перед вступом до школы.

Першы творчі доробкы, котры были написаны по україньскы, были опублікованы у містных новинках Молодь Закарпаття і Новини Виноградівщини.

Закінчіла Ужгородьскый коледж културы і уменя (рр. 1993 – 1996) по шпеціалізації бібліотечна справа. Наслідно наступила до Винаградівской районной бібліотекы, де робила майже десять років на одділіню краєзнавчой літературы. В році 2005 одышла з родинов до Харкова, де доднесь і жыє, робить на швейній фабриці.

Кінцьом рока 2021 быв выданый першый зборник поезії і прозы Наталії Сідларь-Дубової під назвов Шляхами Не Забутих Почуттів.

Писати по русиньскы зачала недавно, одповідно тому на днешній день арзенал зачінаючой писателькы не є богатый на русиноязычну творчость. Але авторка сміло підчаркує, же намірена є продовжовати на русиньскій літературній ниві, і має ясну візію, як ся дасть зліпшовати.

І вже сесь рік образчікы русинськой поезії од Наталії Сідларь-Дубовой были выбраны до публікації Алманах днешньої русинської літературы (приготовленый до друку).

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Слухайте «Голосы Русинів Підкарпатя» в середу 28-го септембра 2022 р. о 18.10 год., або повторіня в четверь 29-го септембра о 4.30 год. і в суботу 1-го октобра 2022 р. о 11.00 год. за русиньскым часом.