«Голосы Русинів Підкарпатя» – середа, 18.10 год.

Іван Завадяк – єден із немногых карпаторусиньскых писателів, котрый пише справды квалітны творы на роднім языку.

Родив ся наш герой у селі Новоселиця на днесь Хустьского, а на тот час Воловского і затым Міжгірьского района у многодітній селяньскій родині. Проробив на різных посадах цілых 55 років.

Писати художны літературны творы русиньскым языком зачав у пензійнім віці. Як говорить сам, то ся стало по тім, як му приснила ся мамка вночі на Рождество 2017-го року і попросила написати книжку.

Оповіданя на русиньскім языку зачав публіковати у журналі «Отцюзнина» із того же 2017-го року, а пак давав творы до вшыткых выдань «Альманаха днешної русинської літературы».

Быв єдным із упорядкователів і авторів книгы історічно-културолоґічных нарисів «Верховина: Волівщина ‒ Міжгірщина» (2017 р.). Є автором роману у новелах «Брызґы спомынÿв из дітвацтва» (2019 р.), і трьох любовных повістей під общов назвов «Выпровбалованя любовльов» (2021 р.).

У днешній час, у Богом даных 85 роках, Іван Івановіч готовить ся до презентації третьой автобіоґрафічной книгы «Налице та й нарубы», котра сімволізує характерістічны і тайны стороны совітського часу.

Слухайте «Голосы Русинів Підкарпатя» в середу 25-го септембра 2024 р. о 18.10 год., або повторіня в четверь 26-го септембра о 4.30 год. і в суботу 28-го септембра р. о 11.00 год. за русиньскым часом.