Головов Карпаторусиньского конзорціума став Ніколас Купеньскый

Новов головов Карпаторусиньского конзорціума Северной Америкы став Ніколас Купеньскый. Конзорціум о тім інформовав у пресовій справі, котра была публікована 11-го новембра 2023-го року.

Асоціованый професор (доцент) Др. Ніколас Купеньскый учіть російскый язык і літературу на Академії воздушных сил Споєных штатів Америкы, а так само довгодобо занимать ся русиньсков літературов, головно Емілійом Кубеком.

Контактны особы про Вашінґтон і Европу

На посаду головы конзорціума быв выбратый 9-го септембра, мандат має на єден рік. „Єм вдячный за принагоду рядити конзорціум тот рік вєдно з нашыма америцькыма і европскыма партнерами,“ повів новый голова конзорціума.

Конзорціум творять головы шестьох карпаторусиньскых културных орґанізацій Северной Америкы: Павел Роберт Маґочій за Карпаторусиньскый дослідный центер, Шарон Джарров за Карпаторусиньске общество, Богдан Горбаль за Лемківску асоціацію, Карен Варян за Русиньску асоціацію, Марія Сілвестрі за Фундацію Тімо, і Ніколас Купеньскый за Світову академію русиньской културы.

Конзорціум почас свого октобрового засіданя выбрав так само заступників членів за окремы членьскы орґанізації. Так само конзорціум призначів свої контактны особы, котров про Вашінґтон стала Елейн Русинко, а про Европу Томаш Калинич.

Підпора літньой школы і вопрос Русинів на Україні

Карпаторусиньскый конзорціум Северной Америкы далше в пресовій справі оцінює свою роботу за попередній період.

Карпаторусиньскый дослідный центер наприклад в тім році підпорив Меджінародну літню школу русиньского языка і културы Studium Carpatho-Ruthenorum 2023, котра орґанізує ся на Пряшівскій універзіті в Пряшові. Тот рік была школа по трирічній перерві, што запричінила пандемія. Фундація Тімо заплатила десять штіпендій про участників школы, а Карпаторусиньскый дослідный центер єдну штіпендію.

Конзорціум інформує і о тім, же професор Павел Роберт Маґочій взяв участь на Світовім конґресі Русинів у Новім Саді. „Конзорціум планує підтримовати намагы Світового конґресу Русинів боронити права карпатьскых Русинів як народностной меншыны почас процесу приступу Україны до Европской унії,“ пише ся в документі.

Кедьже Маґочій быв єдиным участником тогорічного конґресу із Северной Америкы, а єдночасно є честным председом Світовой рады Русинів, конзорціум в проходячім меджіконґресовым періоді 2023 – 2025 буде в Світовій раді Русинів за Северну Америку представляти Ніколас Купеньскый.

Выдавательска робота і діґіталізація

Карпаторусиньскый дослідный центер має в плані далше підтримовати выдаваня і дістрібуцію книг на русиньскы темы, включно комплетного перекладу Нового Завіта, котрый зробило на Словакії Общество святого Йоана Крестителя. Русиньскый перекладє приготовленый до друку.

Як далше інформує конзорціум, Карпаторусиньскый дослідный центер і Світова академія русиньской културы орґанізують округлый стіл ку пятому выданю книгы Павла Роберта Маґочія з назвов Our People: Carpatho-Rusyns and Their Descendants in North America (Нашы люди: Карпатьскы Русины і їм потомкы в Северній Америці), котре вышло в тім році.  Перше выданя є з року 1984, в найновішім суть актуалізованы дакотры тексты, штатістічны даны, а так само приданы новы знимкы і мапы.

Округлый стіл одбуде ся 2-го децембра у Філаделфії, штат Пенсілванія, і презентації на нім будуть мати Річард Кастер, Богдан Горбаль, Патріція Крафчік, Ніколай Купеньскый і Роберт Зекер.

Припоминаме, же професор Маґочій быв выбратый за члена Польской академії знань в Кракові, што своїм підписом із 1-го авґуста 2023-го року потвердив польскый презідент Анджей Дуда.

Што до выдавательской роботы, конзорціум інформує, же едітором офіціалного пресового орґану Карпаторусиньского общества The New Rusyn Times стала Каріна Муляр.

Лемківска асоціація продовжує у выдавню квартальника Karpatska Rus, котрого едітором є Пол Бест.

Асоціація недавно здіґіталізовала выданя америцькой русиньской ґазеты Лемко з років 1928 – 1940 а так само велику часть выданя далшой ґазеты Карпатска Русь – Karpatska Rus‘- Carpatho-Russia, з років 1940 – 2008. Здіґіталізованы історічны выданя суть доступны на сайті Лемківской асоціації.

Членьскы орґанізації конзорціума орґанізовали або брали участь і на далшых русиньскых або з Русинами повязаных подіях. Далша стріча веджіня конзорціума є напланована на децембер.