«Говорить Пряшів» – пятниця, 18.10 год.

Іщы тыжден тому просили сме Вас на «Говорить Пряшів» дост радістно. Писали сме, што пятниця то початок вікенду, што то милый і приємный час. За тот час змінило ся вельо, такой світ ся выкатулял горізнач.

Правда, і днешня пятниця то тіж все початок вікенду. Лем же в обставинах пандеміі коронавіруса не знатя, як долго тот примусовый «вікенд» буде тырвал. Уж тепер знаме, што од будучого тыжня більшіст люди остане в хыжах, не підут до роботы. Закрываны сут школы, університеты, культуральны інституциі, суды, але і просто приватный бізнес. Може быти біда. Фінансова. Хоц чым она є взгядом нашого неоціненого здоровля? Майме на ся позір.

Найліпшым моментом, жебы одсвіжыти, дакус ліпше познати нашы русиньскы справы, єст слухати наше радийо в порогах Вашых хыж, в котрых сме змушены остати в найблизшых тыжнях. В ЛЕМ.фм николи не бракне порядной музикы, а при тым – порядных проґрамів. Поучытельный «Говорить Пряшів» то найліпшый доказ нашой місиі.

А што днес? На початок культурны інформациі. Пак част «Нашы целебриты». І ту штоси цінне про Лемків, понеже буде спомин на Миколая Громосяка, креницкого громадского і церковного діяча, єдного з покріпителів Руской Народной Республикы Лемків. В «Книжници.фм» Ігор Латта прочытат творчіст Штефана Смолея. Буде і «Перличка» – як все з архівной карпаторуской пресы. На конец іщы Теодозия Латтова в ій авторскій «Припоминці».

Сердечні просиме. Коли як не тепер?