«Говорить Пряшів» – пятниця, 18.10 год.

Коли заперают нам штораз веце обшыри жытя, не остає нич інче, як досправды остати дома і запустити сой радийо. Братскє радийо Русин.фм не сповільнят роботы, хоц час, як знаме, є тяжкій, то так само як каждый тыжден приносит нам вельо цікавого до послуханя.

Днес можете дознати ся м.ін., на што звернути свою увагу, кєд іде о світ культуры, што, де і як мож видіти, коли вшытко з причыны протипандемічных ограничынь є заперте. Історичный Kалендар традицийно приносит жменю інформаций звязаных з датами минулого тыжня і подіями, котры прошли рокы тому.

Час тяжкій не лем з причыны пандеміі, але і зато, што момент переходу зимы в яр мішат в головах, а і тільо слабує. Быти може ани ся не хоче чытати, та не треба, бо в Книжници почытают за нас, але і для нас. Перличка приносит архівальный допис на вынятково інтересуючу тему. Яку? Тото лишам уж Вам одкрыти…