«Говорить Пряшів» – пятниця, 18.10 год.

Сме перед великодніма святами. Уж днес Велика Пятниця для вірных тых Церкви, котры тот найбільшый християньскій праздник припоминати будут за тзв. новым стильом.

Сес новый стиль хоснуваный єст через Русинів в більшости на Пряшівскій Руси (грекокатолицка Церков), а тіж через Русинів розсіяных по цілым світі, незалежно ци приналежат до східніх католицкых Церкви, ци до православной. Заєдно в нас на Лемковині надале тримаме ся того, што свята празднуєме за старым стильом, подля юлияньского календаря.

Лемкы доднес не діждали ся свойой церковной структуры. По травмі выселінь не вернула Апостольска Адміністрация Лемковины. Переважно поділены сме серед двох конфесий, в структурах Польской Автокефальной Православной Церкви і Украіньской Грекокатолицкой Церкви. В ПАПЦ, там, де сут лемківскы вірны, а парохами сут Лемкы, проповіди, а часом і недільны чытаня сут голошены радше по лемківскы. Ніт того в УГКЦ, де хоснуваня лемківского языка в церковным жытю єст заказане.

Одходячы од конфесийных завірувань і повязаным з тым політичным влияньом на достоменніст Русинів в Польщы, днес хочеме святочно возвістити радіст Воскресіня Христового для вшыткых нашых слухачів. Хоц світ стоіт перед великом пробом, так традицийно желаме нашым любителям спокійных, радістных і предовшыткым здоровых свят. Святкуєме вєдно на тілько, на кілько нам на тото дозваляют. О тыжден одозвеме ся зас – желаючы святкуючым за старым стильом.

В Велику Пятницю хочеме запросити Вас на дальшу передачу з Пряшова. В днешнім «Говорить Пряшів» традицийо вшыткы части. Петро Медвідь поведе нас по культурных інформациях. Надале представит дакус істрориі, а і особу Віктора Кімака. Пак Теодозия Латтова приведе пару слів про традицию Великодня. Вшытко тото лем про Вас.

Веселых Свят!