Грошы намісто цінностей

По довшім часі знова в послідніх днях мали сьме можливость видіти театралны выконаня части депутатів Верьховной рады Україны, котры дотуляли ся темы приятя закона, котрым бы ся заборонила Україньска православна церьков. Виноваты суть вшыткы, а грошы суть перед цінностями.

Верьховна рада Україны іщі в октобрі минувшого року прияла в першім чітаню пропозіцію закона, котрым бы мали быти заборонены реліґійны орґанізації, якы суть повязаны із Російов. І кедь то звучіть софістіковано, знаме, же в законі іде першорядо о заборону Україньской правосланой церькви, хоць она уж много раз декларовала, же є окремов церьквов.

Але кілько раз бы ся не одхрестила од Москвы, і то нелем словами, але чінами, нич їй то не поможе, бо інтерес державы, і ньов створеной Православной церькви Україны є ясный.

Од того, як быв закон схваленый в першім чітаню, перешло уж доста часу, але ку голосованю в другім чітаню ся Верьховна рада не дістала. Оно то не є аж таке просте, бо прихыльників такый закон в демократічнім світі лем тяжко глядать.

Без того, жебы сьме входили до еклезіолоґічных проблем, треба ясно повісти, же якы обставины бы в державі не были, заборона выбратой церькви є важным засягованьом до прав чоловіка. Кедь бы сьме забыли на вшыткы іншы меджінародны документы, пак треба спомянути хоцьлем тото, же докінця і в Харті основных прав Европской унії, Главі ІІ., Статі 10, пише ся о слободі віроісповіданя. Україна як кандідатьска держава бы о тім мала нелем знати, але ся того і тримати.

Но по театрі, котрый в тых днях проходив у Верьховній раді, перед тым, як собі дав парламент вакації, было інтересне чітати коментарь на тоту тему, котрый публіковала на соціалній сіті депутатка за Слугу народа – Маріяна Безугла.

На марґо того, же знова не дішло ку голосованю, своїм чітателям выраховала вшыткых виноватых, кторы суть, самособов, під впливом російского лобінґу.

Цінности як слобода віроісповіданя не суть лобінґ Москвы. То основны, меджінародно признаваны права чоловіка.

Ватікан, котрый має проблему з такым законом – то фактор російского впливу. То, же з тым мають проблему і Споєны штаты Америкы, так само є під впливом російского лобінґу. Треба припомянути, же Споєны штаты докінця выгоружують ся наданьом санкіцй на депутатів, котры за такый закон заголосують.

Депутатка Безугла, і она не буде вынятком але скоріше правилом, не розуміє, же западны країны, западный світ може роздумовати о правах чоловіка, о цінностях, котры вызнавать, як о дачім прінціпіалнім, чого не мож дотулити ся, і кебы не знам як „добру“ причіну бы єсь на то мав.

На другім боці є думаня, же вшытко мож, і вшытко собі мож зробити подля себе, як мі то якраз теперь пасує, топтати і по правах, і єдине, што то може змінити, є вопрос грошей.

Маріяна Безугла в споминанім коментарі пише, і то правда, же днесь кажда єдна гривня – то грошы партнерів, головно Споєных штатів. Значіть, прияти дашто, што бы могло заперти касу, не є таке просте. І зато має до Америкы одыйти делеґація, котра знова буде намагати ся пересвідчіти америцькых партнерів, же закон о забороні Україньской правослованой церькви є в порядку.

Но, думам, же таке штось, жебы досправды пересвідчіли країну, де є така розмаїтость віроісповідань, і де є віроісповіданя основне право, же засягованя до такого права є в порядку, буде доста інтересне. Але іщі інтересніше є дашто інше.

В коментарі україньской депутаткы красно розкрывать ся думаня о правах, цінностях, котрых на Западі нихто не може дотулити ся. Они то просто спробують. Они тоты права і цінности не чують. І єдине, што бы тому могло заборонити, то є запертя америцькой ці европской касы.

Цінности як слобода віроісповіданя не суть лобінґ Москвы. То основны, меджінародно признаваны права чоловіка. Україна має право карати колаборантів, і тых з церьковных кругів. Але є недемократічне заборонити цілу церьков.

Но ку тому, жебы собі то в Києві почали усвідомльовати, треба прінціпіалну зміну думаня. Перестати честовати лем грошы намісто цінностей. Тота зміна, нажаль, довгодобо не приходить. Ани кедь народ терпить во од войны.

Статя была написана як коментарь „Вступне до контроли“ лемківского радія lem.fm. Фото: Pixabay.com.