Хто і што буде робил в 2017 році

Початок рока для соспільных орґанізаций, якы діют в опертю о міністерияльны дотациі, то час чеканя на результаты набору внесків на даний рік. То час, коли більшіст (хоц не вшыткы) орґанізаций не роблит нич, а активнійшыма остают, коли іхні конта будут наполнены. Не мож того повісти напр. о Стоваришыню Руска Бурса, котре єст м.ін. выдавьцом офіцияльно зареґіструваного в суді як штоденник – радия ЛЕМ.фм, котре не може сой позволити ани на минуту оддыху. Надає фурт, через 24 годины на добу, при заанґажуваню парунадцетьох осіб. Нероздільным з радийом єст інформацийний панрусиньскій порталь, якій выникнул без дотациі, перед парома роками, як спертя для радия, а переформувал ся в розбудуваний сайт, котрий парократні на ден єст актуалізуваний, до ведіня котрого фурт приходят новы особы. Окрем выміненого, Стоваришыня Руска Бурса початком каждого рока орґанізує Перегляд Колядничых Ґруп для учеників лемківского языка. Подібні было і в тым році, з том ріжницьом, же колядникы завандрували аж на краківскій рынок, жебы похвалити ся лемківскым языком і святочныма віншуванями, бібліотека Руской Бурсы ведена єст штоден (в год. як подано гев), а ансамбль Терочка мал уж своі першы тогорічны выступы.

Рішыня о признаню тогорічных ґрантів з пулі Міністерства Внутрішніх Справ і Адміністрациі проходило в двох турах. Перша інформация о розділіню середків на реалізацию задач, якых цілю єст охорона, захованя і розвиток культуровой достоменности нацийональных і етнічных меншын та захованя і розвиток реґіонального языка, явила ся в грудни/децембрі 2016 р. Вказало ся товды, же розділены были 2/3 з квоты передвидженой на меншыны, т.є. коло 10 млн зл. Незадоволены орґанізациі достали час до 17. січня/януара, жебы присылати писма з просьбом розмостріти наново зложены внескы. Кінцьом лютого/фебруара т.р. на сайті Департаменту Нацийональных і Етнічных Меншын поміщено конечне рішыня Міністра о фінансуваню тогорічных проєктів.

Меньше драматичні проходило інформуваня о розділіню дотаций на проґрамы Міністра Культуры і Народовой Спадковины. Обышло ся без догрывок. В половині лютого/фебруара поміщено на сайті Міністерства файлі з даныма о фінансуваню проєктів з выбраных проґрамів.

Ниже подаєме сумаричний спис фінансуваня орґанізаций, якы менуют ся лемківскыма, або такыма, якы ближе-дальше діют для лемківской культуры. Декотры з них одкрыто декляруют свою єдніст з украіньском достоменністю, неґуют лемківскій язык (якій єст єдным з основных прикмет дефініюючых окрему достоменніст), зато чудує факт, же старают ся о ґранты з лемківской пулі. В законі з дня 6. січня/януара про нацийональны і етнічны меншыны та про реґіональний язык ясно вычыслены сут нацийональны і етнічны меншыны. Сут серед них і Украінці, і Лемкы. Декотры же зґрупуваня голосят екуменічну єдніст і братаня ся. Лем выбраны не фліртуют з другыма, а твердо тримают ся лемківской достоменности.

Сумаричне сопоставліня дотаций, походячых од обох Міністерств:

• Лемківскій Ансамбль Пісні і Танця Кычера 897.000 зл:
  – перебудова і розбудуваня будинку, якій єст сідибом Ансамблю… (ІІІ етап) 678.000 зл,
  – текуча діяльніст Ансамблю… 29.000 зл,
  – діяльніст працовні лемкознавчых досліджынь 20.000 зл,
  – орґанізация ХХ Медженародного Фольклористичного Фестівалю Світ під Кычером 80.000 зл,
  – артистична діяльніст Ансамблю… 90.000 зл.
• Стоваришыня Промоциі Лемківской творчости Серенча 23.000 зл:
  – текуча діяльніст ансамблю 8.000 зл,
  – концерт пн. Творча інтерпретация традициі 20 років лемківского фолькового ансамблю Серенча 15.000 зл.
• Товариство для Розвитку Музею Лемківской Культуры 96.000 зл:
  – утриманя Музею Лемківской Культуры в Зындрановій 20.000 зл,
  – діяльніст Музею… 20.000 зл,
  – діяльніст бібліотекы і архіву діючых при Музею… 13.000 зл,
  – Од Русаль до Яна 2017 25.000 зл,
  – публикация річника Музею… 8.000 зл,
  – інвентаризация колекций Музею… 10.000 зл.
• Єпархіяльний Осередок Православной Культуры Елпіс 89.000 зл:
  – ведіня бібліотекы і діґіталізацийной працовні 10.500 зл,
  – XII Загальнопольскій конкурс лемківской поезиі для учеників основных шкіл і ґімназий 8.500 зл,
  – консервация кіриличных стародруків 70.000 зл.
• Фундация Стара Дорога 40.000 зл:
  – Лемколянд – лемківскє едукацийне писмо для діти 15.000 зл,
  – Лемколянд – едукация через забаву 10.000 зл,
  – Лемківска Книжочка 15.000 зл.
• Стоваришыня Лемко Тавер 190.050 зл:
  – фінансово-книгова обслуга Стоваришыня 12.000 зл,
  – діяльніст ансамблів Лемко Тавер і Лемко Тавер Юньор 29.050 зл,
  – Ватра в Лугах 55.000 зл,
  – Radio Lemko 50.000 зл,
  – Lemko TV 15.000 зл,
  – польско-лемківскій розмовник Побесідуйме по лемківскы 13.000 зл,
  – G. Orwell, Animal Farm по лемківскы 16.000 зл.
• Стоваришыня Лемків 181.000 зл:
  – підметова діяльніст Стоваришыня… 15.500 зл,
  – діяльніст Ансамблю Пісні і Танця Ластівочка і Діточого Ластівчата 25.000 зл,
  – XXXV Лемківска Творча Осін 5.500 зл,
  – «Лемківскій Річник на 2017 рік» 8.000 зл,
  – двомісячник «Бесіда» 30.000 зл,
  – XXXVIII Лемківска ватра на Чужыні 60.000 зл,
  – XI Стрічы Трьох Поколінь з Лемківском Культуром 7.000 зл,
  – XXV Стрічы з Лемківской Культуром 10.000 зл,
  – промоция народной обрядовости Лемків через реконструкцию і презентацию артистичного видовиска Лемківскє Весіля 20.000 зл.
• Стоваришыня Руска Бурса 377.000 зл:
  – спертя ведіня осередка лемківской культуры Руска Бурса 25.000 зл,
  – Руска Бурса – ведіня осередка культуры, світлиці і бібліотекы 12.000 зл.
  – ведіня ансамблів Терка і Терочка 15.000 зл,
  – печатаня «Річника Руской Бурсы» 2017 8.000 зл,
  – Тыжденник lem.fm+ 20.000 зл,
  – печатаня моноґрафіі лемківского села Білцарева 12.000 зл,
  – лемківскє радийо ЛЕМ.фм 285.000 зл.
• Обєднаня Лемків 289.000 зл:
  – текуча діяльніст Обєднаня 27.000 зл,
  – стрічы з Лемковином 9.000 зл,
  – XVII Лемківскій Єрусалим 11.000 зл,
  – квартальник «Ватра» 25.000 зл,
  – лемківскы кєрмешы 9.000 зл,
  – діяльніст ансамблю Лемківскій Перстеник 3.000 зл,
  – XXXV Ватра в Ждыни 205.000 зл.

Окрем выміненых лемківском спадковином занимати будут ся тіж інчы інстутициі:

• Ґмінний Осередок Культуры в Устю Рускым достал 20.000 зл на орґанізацию задачы пн. Лжычкарство в Новици;
• Музей Дворы Карвациянів і Ґладышів в Ґорлицях зорґанізує цикль співочых варштатів пн. Мастер традициі – Юлия Дошна, дотация 19.963 зл,
• римокатолицка парохія в Устю Рускым отримала 140.000 зл на ремонт выбраных елементів і части середины лемківской церкви св. Параскєвы в Квятони,
• римокатолицка парохія в Поворознику отримала 300.000 зл на зробліня автоматичной інсталяциі до гашыня огня в лемківскій церкви св. Якова в Поворознику.