Хто найліпше старал ся о лемківскы забыткы?

Ґенеральний Консерватор Забытків в Польщы оголосил конкурс для опікунів забытків і тых, котры заряджают забытками, вписаныма в державний реґістер забытків. То конкурс, в котрым доцінены будут едукацийны діяня, підняты цілю популяризувати знаня про культурове дідицтво і зміцняня соспільной свідомости значыня забытку.

З обшыри Лемковины в державний реґістер забытків вписаных єст коло 130 обєктів і комплексів обєктів. То головні забыткы сакральной архітектуры (церкви, дзвінниці, капличкы ітп.), або сельска забудова. До іх вознесіня причынили ся Лемкы, але на нашій земли сут тіж забыткы, якы сут ділом рук інчых наций, напр. воєнны цмонтері, або стациі узкоторовой колейкы. Забыткы причыняют ся до утримуваня памяти о місцях, людях і істориі, до вказуваня культурового дідицтва даной обшыри.

Жебы взяти участ в конкурсі, треба до 26. вересня/септембра т.р. зголосити проєкты, котры, по перше – реалізуваны были в 2015. році, а по другє – задачом проєкту было популяризуваня знаня про даний забыток, чого ефектом мало бы быти влияня на збільшыня свідомости соспільства про потребу захованя забытків в добрій кондициі.

Зголошыня можут быти присыланы в трьох катеґориях:

• прелекциі, выклады, варштаты,
• пленеровы активносты,
• выставы і мультімедияльны проєкты.

На выграных конкурсу ждут фінансовы нагороды. Зголошыня проєтків треба выслати на адрес: Narodowy Instytut Dziedzictwa, ul. Kopernika 36/40, 00-924 Warszawa.

Примірным проєктом, якій выполнял вшыткы критериі передуманой концепциі промоциі забытку з тырвалыма ефектами, был проведений влони проєкт пн. Кольорова церков. В церкви свв. Космы і Даміана в Бортным была зорґанізувана найперше професийна выстава, полністю представляюча знаня про вельофаребніст церкви, іконы церкви та історию бортняньскых парохів, пак проведено документацию і кверенду цілости артистичных, забытковых та історичных прикмет церкви. А на фінісажы выставы, якій кінчыл речений проєкт, запрезентувана была мультімедияльна аплікация, даюча змогу віртуальні звидіти і обзерати церков таком, яком была в ориґінальным виді, а то за справом специяльного дотыкового панелю, замонтуваным в притворі церкви. Попри фінісажы выголошена была тіж наукова прелекция про дослідничы та документацийны працы при забытковых деревяных обєктах. Докладны реляциі з вернісажу і фінісажу можете сой прочытати і пообзерати за мотузками з нашого порталю (вернісаж, фінісаж). Реалізатором проєкту была Мазярска Загорода в Лоси з церквом свв. Космы і Даміана в Бортным Одділ Музею Двору Карвациянів і Ґладышів в Ґорлицях. На жаль, публичны музеі сут вылучены з конкурсу, зато проєкт Кольорова церков не може быти зголошений, хоц єст то, в нашій опініі, барз добрі вказаний примір змогы активно звидіти забыток і познати його історию.