Гуменьскый вікаріят має пять років

У Світлый понедільок (за новов пасхаліов) 18-го апріля 2022-го року в Храмі  Успенія Пресвятой Богородіці в Гуменнім одлужена была торжественна літурґія з нагоды 5-ой річніці зряджіня Гуменьского архієпархіалного вікаріяту.

На святкованю річніці гуменьскый вікарій отець Мартін Злацькый привітав пряшівского ґрекокатолицького архієпіскопа і метрополіту Йоана Бабяка, пріматора міста Гуменне Мілоша Мерічка і далшых гостів. Архієпіскоп Йоан, котрый в Гуменнім одслужыв архієрейску літурґію, участным приговорив ся в проповіді. Торжество річніці в Гуменнім было закінчене обходом коло церькви з чітаньом євангелій о воскресіню Хріста.

Гуменьскый архієпархіалный вікаріят зрядив пряшівскый архієпіскоп і метрополіта Словакії Йоан Бабяк на Великый четверь 13-го апріля 2017-го року. За першого вікарія призначів отця Мартіна Злацького. Вікаріят є на теріторії семох протопресвитератів (деканатів) і має 76 парохій.

Русиньскы актівісты, головно із Общества святого Йоана Крестителя, орґанізації, котра зробила вже множество літурґічных тлумачінь на русиньскый язык, довгы рокы жадають Пряшівску архієпархію о єпіскопа, котрый бы мав на старости душпастырьство Русинів.

На тоты пожадавкы дотеперь не пришла позітівна одповідь. Наопак, зряджіньом вікаріяту в Гуменнім ся реално поділила теріторія, котра є населена Русинами.

Покля протопресвитераты Меджілабірці, Снина, часточно і Стропків а Гуменне, в котрых суть села, де ся люди голосять ку Русинам, пішли під юрідікцію Гуменьского архієпархіялного вікаріяту, під Пряшовом зістав Свідник, Бардейов, Стара Любовня, де суть так само села із русиньскым жытельством.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА