Голосник

Ікона з Клокочова у парохіях Пармской єпархії в США

Ґрекокатолицькы віюруючі з русиньской Пармской єпархії в штаті Огайо, США, мають можливость молити ся при копії чудотворной іконы Пресвятой Богородіці з Клокочова.

Як інформовав Пресовый центер Кошыцькой єпархії, Клокочівска ікона путує по парохіях деканату Огайо в часі од 20-го юна до 23-го авґуста 2020-го року із нагоды 350-ой річніці чудесного слызыня іконы.

Вірну копію чудотворной іконы подаровав владыка Мілан Хаутур, кошыцькый єпархіалный єпіскоп у 2018-ім році владыкови Міланови Лахови, пармскому єпархови почас пути ґреакокатолицькых віруючіх зо Споєных штатів Америкы по вызначных ґрекокатолицькых путницькых місцях і центрах на теріторії середньой Европы. Переданя того подарунку мало сімболізовати комуніту і любов меджі тыма двома єпархіями.

Чудотворна Клокочівска ікона Пресвятой Богородіці є історічно перша із трьох, котры слызыли, на теріторії втогдышньой великой Мукачівской ґрекокатолицькой єпархії. Слызыла в році 1670 в Клокочові, маленькім селі коло Михаловець. Такым способом вказала Богородіця свій покров – охорону, над людми Землпіна, котрый страждав од войны.

Церьков у Клокочові, де мож найти копію оріґіналной іконы, є вызнанчным путницькым місцьом про ґрекокатоликів. Того часу Кошыцька єпархія робить на выбудованю путницького дому.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси, в місті Пряшів. Локалпатріот. Актуалну тему з його точкы погляду мож чути каждый четверь в проґрамі Вступне до контроли о 18.10 год. Каждый робочій день од 8.00 год. мож слухати його Корзо, в котрім вас возьме до світа актуалной політікы. Контакт: petro@lem.fm

Коментарі