Історія уменя у Вігорлатьскім музею

Новый музейный проєкт під назов Історія уменя – то часть онлайн понукы Вігорлатьского музею в періоді, коли музей, подобно як і далшы културны інштітуції з причіны обмеджіня пошырьованя хвороты COVID-19 є про навщівників запертый.

Понука є цілена про старшу молодеж, штудентів і дорослых з інтересом о спознаваня реґіоналной історії і културне діяня у своїм оточіню.

Історію уменя сприступнив Вігорлатьскый музей в Гуменнім сімболічно почас Світового дня уменя, котрый ся святкує 15-го апріля. В тот день народив ся італійскый умелець Леонардо да Вінчі, автор прославленых образів Мона Ліза ці Тайна вечеря.

Штудіюм і себепрезентація

Цільом музею є вказати уменя в шыршых сполоченьскых повязанях, приближыти уменя в музейных експозіціях, у выставковых просторах музею, в команатах каштелю і в цілім просторі реґіону Вышнього Земпліна, і дати своїм любителям простор на штудіюм, баданя, себепрезентацію і одпочінок.

Mузей забавнов формов представлює вытварне класічне і інсітне уменя в шырокій палеті вытварных жанрів, проявы народного музичного і співацького уменя, а і драматічне уменя, котрых елементы суть повязаны з людьскым жывотом і суть неодділительнов частьов вывоя цілой сполочности.

В ціклі оповідань о умелецькых творах музей позывать людей ку діалоґу о основі уменя – о значіню і потребі уменя, о слобові умелецького прояву, його підпорі і розвитку, о цілосполоченьскім значіню уменя і непояснительной енерґії уменя в конкретных жывотных сітуаціях людей.

Конкурзны задачі і реґіоналны авторы

Вігорлатьскый музей выбрав творы і авторів з цінной образовой і умелецькой збіркы свого умелецько-історічного фонду од 17-го по 20-те столітя, творы з ґалерійного фонду музею з одказом на реґіоналных авторів, як і збіркы народного уменя етноґрафічного фонду. На фоні історічных дій приближує, чім были умелецькы творы про їх авторів і маїтелів, хто были їх музы, як і чом выникли, з якым посолством ся ку людям пригваряють і што вшытко ся з них днешній чоловік може дізнати.

Цілый новый проєкт мож найти на вебовых сторінках Вігорлатьского музею в Гуменнім. Історія уменя є о уменю спознавати, учіти ся і розуміти світу коло себе.

Музей буде давати людям і конкурзны задачі, котры ся будуть оціньовати все в 15-ый і послідній день в місяці. Апрільова задача черьпать з творчости і посолства двох умелців реґіону – академічной малярькы Олґы Бугайовой і професора, академічного маляря Станіслава Станкоція.

Станіслав Станкоцій

Станіслав Станкоцій (1959 р.) є родак з русиньского села Гостовиці. Є вытварник, дізайнер, ґрафік і педаґоґ.

Штудовав на Середній умелецько-промысловій школі в Кошыцях, пак ґрафіку на Высокій школі вытварных умень в Братіславі. Абсолвовав і штудії в Паріжі і Гелсінках. Є професором на Высокій школі вытварных умень в Братіславі, моментално є у функції проректора і ведучого Ательєру Ідентіта.

Выставльовав свої творы на веце як 70-ох колектівных і 40-ох персоналных выставках в різных країнах Европы і в Канаді. Здобыв веце оцінінь, наприклад за найкрасшу книжку Словакії ці найкрасшый календарь. Ґалерія міста Братіславы о нім выдала і моноґрафію.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА