Камеры в рукы – крутиме фільмы о лемківскых традициях! Забыткоманія 2016

Тырват друга едиция фільмового конкурсу Забыткоманія орґанізуваного Народовым Інститутом Дідицтва во спіплпрацы з Польскым Інститутом Фільмовой Штукы.

Того рока головном темом сут Памятникы Істориі, зато участникы мают нагоду, жебы познати ближе важны місця істориі, якы находят ся коло них. Памятник Істориі то єден зо штырьох видів охороны забытків, вымінений в уставі про захороніня забытків та опікы над забытками з 2003 р. Званьом тым окрислят ся обєкт о выдатным значыню для культуры Польщы. Ранґу званя підкрислят факт, же єст оно признаване Президентом Польщы. До днес выріжнено 60 забытків, якы характеризуют ся особливыма прикметами і значыньом для культурового дідицтва державы. Серед той елітарной ґрупы найближе Лемковины находят ся напр. копальні соли в Бохни і Вєлічці, історична забудова міста Кракова, ци замок в Ланцуті. Листа Памятників Істориі єст мінцо зріжницювана, найдеме на ній забудовы старых міст, мечеты і мізары, археолоґічний резерват, паперний млин, водний пут, палацы, паркы, замкы, твердыні, а навет робітниче осіля. На самій Лемковині не находит ся ани єден обєкт, але як заповіл журналистам о. Володислав Канюк вчас вручаня нагороды Малопольского Воєвідства ім. М. Корнецкого, будут проведены стараня, жебы лемківска церков Покровы Божой Матеры з Ганчовы была признана президентом Польщы за Памятник Істориі, што было бы престіжовым не лем для лемківского селечка, але і для цілого реґіону. Церков в Ганчові была уж спостетежена на высокым щабли – два рокы тому здобыла перше місце в конкурсі, оголошаным міністром культуры і народового дідицтва, пн. Задбаний Забыток в катеґориі деревяны конструкциі і архітектура. Званя Памятника Істориі достало уж вельо сакральных забытків, напр. костел в Ловічу, катедра в Ґнєзні, Фромборку ци ціли монастырскы забудовы (Ясна Гора, Лежайск, Любін, Жаґань і інчы).

Хоц тым разом не мож іщы накрутити конкурсового фільму, або репортажу про дакій лемківскій Памятник Істориі, то до конкурсу мож тіж зголосити фільм звязаний з нематерияльным дідицтвом, значыт з локальныма традициями, обрядами і звыками. З том заувагом, же фільм не може быти анімуваний.

В конкурсі можут стартувати ґімназисты та ученикы выжеґімназияльных шкіл, студенты та абсольвенты фільмовых шкіл. Його цілю єст розвиваня фільмовых пасий та популяризация знаня о забыктах і заінтересуваня місцевым культуровым дідицтвом. Конкурс Забыткоманія то м.ін. проба одчаруваня забытків – справліня, жебы молодым не асоциювали ся лем як малоінтересуючы, нецікавы і з закуреном історийом обєкты.

Фільмы мож присылати до 30. червця/юнія. Дрібниці конкурсу найдете на сайті Народового Іституту Дідицтва.