Кандідовати на посаду пряшівского жупана буде і Русин з Меджілаборець Михал Калиняк

На посаду председы Пряшівского самосправного краю (ПСК) буде кандідовати сучасный централный директор Канцеларії Здружіня міст і сел Словакії (Združenie miest a obcí Slovenska), родак з Меджілаборець, Михал Калиняк.

Кандідатуру Калиняк потвердив про аґнетуру TASR в середу 3-го авґуста 2022-го року. Выборы до містной і крайской самосправы будуть тот рік першый раз споєны, і председа Народной рады Словацькой републікы їх выголосив на суботу 29-го октобра.

Гражданьскый кандідат

Як Михал Калиняк інформовав аґентуру TASR, кандідовати в осінніх выборах буде як гражданьскый кандідат, значіть не буде кандідатом політічной партії. Єдночасно усвідомлює собі важность штонайшыршой підпоры свого проґраму про його ефектівну імплементацію.

„Зато я порихтованый стрічати ся з політічныма партіями, котры інтересовали ся о мою припадну кандідатуру, жебы єм їм представив тезы свого проґраму,“ повів. Політічны партії можуть підпорити го і як гражданьского кандідата.

У своїй візії видить спектрум проблем найлюднатішого краю в Словацькій републіці, при їх направліню хоче схосновати і скушености із 20-літнього діяня в области самосправ. „На многы проблемы мож схосновати рішіня, котры не суть дорогы, а ани бытостно залежны од еврофондів як єдиной спасы. Знам, же ся то дає, і знам як на то,“ деклароє.

Схосновати хоче і детеперішню роботу в штруктурах Здружіня міст і сел Словакії, о то веце, же централну орґанізацію містной самосправы спринимать як важного партнера і при реґіоналнім розвитку.

„Высшый теріторіалный цілок мусить быти великый брат міст і сел, то алфа і омеґа. Зато є мойов візійов, жебы єм не співпрацовав лем з крайскыма посланцями, але і реґіоналныма здружінями Здружіня міст і сел Словакії. В рамках робочого діару бы зато были і выїзды на засіданя тых реґіоналных здружінь,“ повів на марґо свойой представы о веджіню краю.

Тісніше перепоїня меджі містнов і крайсков самосправов бере Михал Калиняк за важне на цілодержавній уровни.

Михал Калиняк

Кандідат на пряшівского жупана Михал Калиняк походить із Меджілаборець. На Філозофічній факулті Пряшівской універзіты в Пряшові штудовав комбінацію політолоґія – україньскый язык і література.

Тоты штудії закінчів у 2004-ім році, о рік пізніше на тій самій універзіті оборонив ріґорозну роботу.

На Пряшівскій універзіті быв пізніше інтерным докторандом, занимав ся теорійов політікы. Докторьску роботу наконець з того фаху оборонив на Філозофічній факулті Універзіты Павла Йозефа Шафарика в Кошыцях.

Калиняк є знамый як фаховець на самосправу і представитель Здружіня міст і сел Словакії. Реґуларно го мож видіти в медіах. Быв і говорцьом пряшівской а петыржалской радніці.

В минулости быв і у практічній політіці. Быв містьскым посланцьом в Пряшові за партію Smer в роках 2012 аж 2016, де жыє, перед тым в Меджілабірцях, одкыль походить, быв у роках 2002 аж 2006 містьскым посланцьом за SDĽ (Партія демократінчой лівіці).

Быв і говорцьом Міністерства школства, наукы, баданя і шпорту Словацькой републікы, так само говорцьом підпредседы влады про сполочность знань, европскы справы, людьскы права і меншыны. Діяв як член веце експертных ґруп.

Актівный быв і у русиньскім русі. Єден час быв докінця на посаді председы Містной орґанізації Русиньской оброды на Словеньску в Пряшові.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА