Карпаторусиньскє Общество іде до Сієтль

В найблизший четвер, 27. жолтня/октобра т.р., Kaрпаторусиньскє Общество в ЗША одбуде подорож до міста Сієтль, в штаті Вашынґтон. Цілю візиты буде проба навязаня контактів з тамтышніма Русинами, а попри тым особами, котры буд-якій звязок чуют з іх карпатскым походжыньом.

Орґанізаторы мают дяку просити о присутніст каждого, хто чує потребу дознати ся про історию Карпатскых Русинів, іх язык, культуру ци обшыр історичного прожываня. Перша стріча в рамках прогулькы общества до Сієтль пройде в єдным з ресторанів, а то зато, же заплянувано тзв. етнічну прогульку через стравы, котрыма найчастійше кормили ся нашы предкы. Но, така стріча при єдным столі даст нагоду на близше познаня єден-другого, та, просто, свобідну форму бесіды на речены темы. Дальше, орґанізаторы кличут, жебы каждий принюс дакій артефакт, або історийку, котра подля него найліпше выражат його русиньскы конексиі.

Карпаторусиньскє Общество як орґанізатор і ініциятор стрічы, має замірене орґанізувати дальшы того рода стрічы в місті Сієтль. Стрічы мали бы проходити протягом рока в ріжных задуманых концепциях, зачынаючы од проґрамів посвяченых фільмам на русиньскы темы, доповідям, музыці, танцям, святочному малюваню яєц та другых. Точний адрес першой стрічы то: Sebi’s Polish Bistro, 3242 Eastlake Ave E, Seattle, WA 98102.