Карпаты – горы культуры

В вікенд 8.-9. липця/юлия т.р. в Саноку одбуде ся Саноцкє Свято Культуры Східніх Карпат «Карпаты – горы культуры». Подія буде проходила головно в саноцкым скансені – Музею Народного Будівництва.

Перший ден фестівалю зачне ся о 17.00 год. двогодинным концертом запрошеных карпатскых ансамблів. По них на сцені загостит украіньска фольково-рокова ґрупа Русичі, выходяча з міста Білгород-Дністровскій (Одеска област). На 20.30 заміряно на рекреацийным просторі в скансені розпалити карпатску ватру, товды же выступит місцевий женьскій ансамбль Відимо.

На другій ден, по Божескій Літургіі, містом на пути з рынку до скансену пройде коровід карпатскых реґіональных ґруп. Пак сценічну част отворят выступліня запрошеных гости, а по них концертувати будут Ансамбль Народного Танця «Санок», ромскій ансамбль Романе Анєля зо Словациі, Лемківскій Ансамбль Пісні і Танця «Кычера» з Ліґниці, ґрупа «Бітля» з Украіны, Ансамбль Пісні і Танця «Ославяны» з Мокрого та наконец карпатска Капеля Древутня.

Музей Народного Будівництва в Саноку основано по ІІ світовій войні. Є він першым і найвекшым під оглядом згромадженых обєктів етноґрафічным музейом в Польщы. Скансен находит ся на обшыри Білой Горы в Саноку, на правым боці Сану. Етноґрафічний парк чыслит 38 гектарів і є поділений подля реґіонів. Єдным з такых є лемківскій сектор, в якым находит ся грекокатолицка церков Рождества Пресвятой Богородиці перенесена з Ріпок (побудувана в 1801 р.). Дальшыма будівлями з Лемковины сут м.ін. хыжа, датувана на 1885 р., та сыпанец з поч. ХІХ ст. походячы з Команчы. З Королика Польского перенесено єднобудинкову загороду з кіцня ХІХ ст., а з Перегримкы загороду з 1870 р.