Катедралный собор і Єпіскопскый палац в Пряшові почінають ренововати

Ґрекокатолицьке архієпіскопство в Пряшові почінать велику реновацію Катедралного собору святого Йоана Крестителя і Єпіскопского палаца. У віторок 18-го авґуста 2026-го року о тім інформовав Інформачный центер Пряшівской архієпархії.

Обновліня народных културных памяток в сумі майже 1,5 міліона евр представлює єдну із найвызначнішых інвестіцій до охраны історічной дідовизны в Пряшові за остатні рокы.

Проєкт під назвов Обновліня, модернізація і сприступніня Катедралного храму святого Йоана Крестителя і Єпіскопского палаца в Пряшові про розвиток културного турістічного руху має розрахунок 1 474 564 евр, і його реалізація є напланована на період 24-ох місяців.

„По веце як двох роках рихтовань, фаховых бадань, проєктованя і адміністратівных процесів наконець дістаєме ся до фазы видимой обновы тых вызначных історічных обєктів. То важный крок ку захованю културной і духовной дідовизны, а єдночасно ку піднятю актрактівности Пряшова про навщівників домашніх і зо заграніча,“ повів проєктовый манажер проєкту, митрофорный протоєрей Даніел Дзуровчін.

Головным цільом проєкту є заховати, обновити і сприступнити дві вызначны културны памяткы, котры належать ку домінантам історічного центра Пряшова.

Як інформовала архієпархія, реновація замірять ся на одстороніня довгодобых тенічных проблем, включно затіканя і вогнутя мурива, оправы стріх, фасад, облаків, як і модернізації електроіншталації, озвучіня і далшых технічных сістем.

Катедралный собор святого Йоана Крестителя належыть меджі найстаршы і найціннішы сакралны будовы в Пряшові. Його історія сягать аж до 14-го столітя, коли на тім місці стояла ґотічна каплічка, котра служыла містьскому шпыталю. Храм перешов веце перебудовами, причім днешню барокову подобу здобыв у половині 18-го столітя.

Послідня велика реновація цілого комплексу собору і палаца проходила в роках 1994 аж 1995.

Проєкт є сполуфінанцованый із Европского фонду реґіоналного розвитку в рамках вызвы на інвестіції до културы, природной дидовизны і турістічного руху.