Коли обводниця в Креници?

Крениця потрібує обводниці. То факт. Курортне місто од років має проблем з автомобільном комунікацийом. Причынят ся ґу тому великє чысло туристів, як і тото, што через ціле місто іде лем єден головный пут.

О плянах побудуваня додатковой дорогы – обводниці, інформуют креницкы самоурядовы власти. Як про порталь sandeczanin.info бесідувал бургомайстер Пьотр Рыба, обводниця то стратеґічна інвестиция для цілого міста. Напевно складала бы ся она з вельох етапів і тырвала пару років.

Проблематичны сут головно дорогы ул. Пілсудского і Здройовой. На них найчастійше являют ся коркы. Власти хочут створити сіт альтернативных доріг як раз для тых двох головных. В плянах єст тіж будува получыня медже селом Розтока Велика, Солотвинами (давне село, днес част Крениці) і Чорным Потоком на полудньовым краю міста. Бургомайстер бесідувал уж з властями сусідньой ґміны Лабова. Треба змінити студиюм просторового заґаздуваня, як іде о получыня з Розтоками.

Інвестицийны пляны міста в тій обшыри не сут новы. О будові обводниці для Крениці думано уж перед войном. Єст она барз потрібна. Причыном сут коркы, найвекшы все в туристичным періоді, зимом і літом. Окрем того головныма дорогами міста іздят тіж тяжкы авта, што так само є проблемом. Головный пут Крениці то част воєвідской дорогы но. 981. Част з плянуваной дорогы мала бы вести через лісы. Прото тіж бургомайстер Рыба старат ся о опінію м.ін. Державных Лісів.