Голосник

Коли роверострадом од Санока по Закопаного?

8. лютого/фебруара тр. в Рыманові підписано деклярацию спілпрацы для будовы біциґльовой долгодистансовой дорогы: Роверострада Солина-Закопане. Концепция закладат будову двох роверовых трас на обшыри підкарпатского воєвідства, то є Velo Karpatia i Velo San та трасы Velo Beskid i Velo Ropa в малопольскым.

Траса, коротко представляючы, мала бы вести од Санока через Рыманів, Ясло, Біч, Ґорлиці, Новый Санч до Закопаного. В Рыманові стрітили ся представникы пятьох стоваришынь з підкарпатского і єдно з малопольского воєвідств (Лучыт нас Санок, Стоваришыня Активный Бескід, Коросняньскє Товариство Циклистів, СТ Сокіл Ясло, МТБ МОСіР Дукля та GorliceBike.pl).

Сиґнатариі проєкту будут піднимати спільны, активны діяня, жебы заохотити самоурядовы власти, з підпором власти державы і Евросоюзу, побудувати безпечны біциґльовы дорогы з ознакуваньом і додатковом інфраструктуром. Подля стоваришынь зосередженых в деклярациі спілпрацы, побудуваня роверострады значучо влине на промоцию біциґльовой туристикы, збільшыня туристичного руху в реґіонах, а тіж причынит ся до зменшыня автомобільного руху і емісиі спалин.

Концепция закладат будову двох біциґльовых трас на обшыри підкарпатского воєвідства – Velo Karpatia i Velo San, та двох на обшыри малопольского – Velo Beskid i Velo Ropa.

Траса Velo San початок буде мала в Саноку, одкале долином рікы буде вела до Загіря і Ліска, пак до Солиньского Озера, а в дальшій перспективі до джерел Сану. В плянах є тіж получыня трасы Velo San з Санока в пілнічну страну зо Східнім Роверовым Путьом Green Velo в околицях Дынова.

Velo Karpatia свій початок мала бы на граници малопольского воєвідства в місточку Біч. Дале ідучы на схід (уж через підкарпатскє воєвідство) – через Ясло, Коросно, Івонич, Рыманів в страну Санока, жебы получыти ся з Velo San.

Velo Beskid то концепция трасы в реалізуваным самоурядом Малопольского Воєвідства проєкті Зінтеґруваной Сіти Роверовых Трас Velo Małopolska, ведуча од Біча през Ґорлиці, Ґрибів до Нового Санча, де лучыт ся з Velo Dunajec – є то біциґльова траса, котра в більшости уж є оддана і веде до Закопаного.

Velo Ropa мала бы вести вздолж берегу рікы Ропа, ґу єй джерелам до Высовы. Одтале ішла бы урокливыма странами Лемковины до Крениці. Дале до Закопаного буде мож доіхати істнуючыма дорогами Velo Krynica, Euro Velo 11 i Velo Dunajec.

Описаны штырі трасы доцільово творили бы біциґльову дорогу Солина-Закопане.

Шеруй.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од вельо років доносит о вшыткым, што ся діє на Лемковині. І не лем. Штоденньо од 11.00 год. веде lifestyle'овый проґрам «Пачісна година» , а в суботы о 9.00 год. чытат для Вас порталь. Контакт: natalia@lem.fm

Коментарі