Конференція Европа Карпат з участьов ПСК

27-го і 28-го фебруара 2021-го року одбыв ся за порядком 28-ый річник меджінародной конференції Европа Карпат, котрой орґанізатором є Сейм Польской републікы. З причіны пандемії конференція прімарно перенесла ся до онлайн простору.

На конференції мав представителів і Пряшівскый самосправный край (ПСК). Участь брав і председа краю Мілан Маєрьскый. Жупан выступив формов відео приговору з підпорным становиском про Макрореґіоналну стратеґію про Карпаты.

Конферецнія одбыла ся коротко по 30-ій річніці выникнутя Вышеґрадьской ґрупы (V4). Головныма темами были: будучность централной Европы в мінячіх ся ґеополітічных обставинах, інфраштруктура оси север-юг спаяючой крайны в рамках Ініціатівы Триморя, розвиток пригранічных реґіонів, а култура карпатьскых країн і молодежи жыючой в реґіоні.

„Карпатьска стратеґія уможнить країнам реґіону Карпат наповно заміряти ся на сполочны вызвы з цільом підняти поставліня країн централной і выходной Европы в рамках Европской унії. Віриме, же ся так само зліпшыть перепоєность з орьєнтаційов северо-южні і дійде до споїня Балтічного з Ядраньскым і Чорным морьом посередництвом ключового транспортного корідору Via Carpatia. І же нашы намагы і крокы поведуть ку укріпліню співпраці меджі реґіонами і ку їх общому розвитку. Амбіційов ПСК є співпрацовати при розвитку макрореґіону Карпаты, котры суть унікатным місцьом і унікатнов мултікултурнов дідовизнов,“ повів пряшівскый жупан Маєрьскый.

Карпатьска стратеґія хоче звекшыти атрактівіту реґіону і зліпшыти условія і якость жывота жытелів той теріторії. Так мож дефіновати головны цілі. Є ініціатівов Польщі.

„Ключовым моментом, котрый можеме назвати початком меджінародных робот над Карпатьсков стратеґійов, было підписаню Карпатьской декларації на Економічнім форумі в Криниці. Втогды представителі влад Словакії, Мадярьска, Україны і Польщі зачали намагати ся о приятя стратеґії на уровни Европской унії,“ повіла Малґожата Яросіньска-Єдинак із польского Міністерства фондів і реґіоналной політікы.

„Карпатьска стратеґія є амбіціозна ініціатіва, котра досконало пасує до розвитку черезгранічной співпраці,“ додала.

Жрідло фотоґрафії: Marek Kuchciński.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА