Конґресова «Бесіда» – місяці май і червец

Перед двома важныма подіями для Стоваришыня Лемків явил ся друком дальшый номер часопису той орґанізациі – «Бесіда», ч. 3 (180) за місяці май/червец 2021 р.

Гевсе чысло, подібні як два попередні, дальшый раз припоминат нам о тырваючым Нацийональным Повселюдным Списі і кличе нас до гордого декляруваня нашой нацийональности.

Часопис явил ся такой в передден ІХ Конґресу СЛ і на два місяці перед ХVI Конґресом Русинів, якій одбуде ся 10.-11. вересня/септембра 2021 р. в Креници.

В посліднім выданю прочытаме м.ін. статі:

• Андрий Ковальскій, Варштаты Басейну Культуры на Нижнім Шлеску в Кружку Стоваришыня Лемків в Пшемкові;
• Петро Трохановскій, Моі Світовы Конґресы Русинів (2);
• Наталія Малецка-Новак, Лемкы в Ермітажы;
• Михаил Лихутин, Запискы о поході на Угры 1849 рока (2); (шырше до темы: Русины Австрийской Імпериі в дневниках і споминах росийскых офіцерів – участників Мадярского Походу 1849 рока);
• Юрий – Кальман Жаткович, Народный Календар (3);
• Ваньо Дзядик, Весняны приповідкы;
• Анна Кырпан, Петра Кырпана мысли зачесаны і незачесаны (4).

Окрем спомненых горі дописів, очы чытача тішат конкурсовы оповіданя молодых і здібных учеників лемківского языка. То продолжыня оповідань з попереднього номеру. Чытати можеме Павлину Дямбу в оповіданю Скарб мойого діда, Ольгу Дошну в тексті Пісні бабы Юлиі ци Зузанну Баню в оповіданю під назвом Скарб дідів. Матвій Смеречняк зас публикує Найвекшый скарб мойого діда, де вмістил свій авторскій верш під назвом Іде зима. Посліднім і найдолшым тексом з презентуваных в «Бесіді» є оповіданя Скарб мойой бабы і мойого діда, авторком котрого єст Александра Смеречняк.

В части «Одышли од нас / Попращали мы» Петро Трохановскій споминат особу покійного Павла Стефановского, выдатного лемківского діячя, писменника, політика і етноґрафа, якій вмер під конец марця тр. «Бесіда» публукє так само єден з барже відомых вершів покійного – Ци помнеш, Лемку, якій был записаный такой одраз по повороті Стефановского з выгнаня до Білянкы, в 1959 р.

Найдеме в часописі – як все – цікавы выімкы з польскых та словацкых ґазет, де м.ін. можеме чытати інтервю посвячене новым лемкознавчым студиям на Ягайлоньскым Університеті.

Двомісячник «Бесіда» то часопис Головного Заряду Стоваришыня Лемків, выходит од 1989 рока, присвяченый єст збережыню істориі, культуры і языка Лемків, інформуючый о жытю нашой і братніх нам соспільности, плекаючый вірні надіі прадідів і вітців.

«Бесіду» мож почытати в бібліотеці Руской Бурсы в Ґорлицях, котра отворена єст в четвергы в год. 10.00-15.00, в суботы в год. 10.00-13.00 або по індивідуальным догваріню в інчым терміні. Ґазета є тіж доступна в локальных Кружках Стоваришыня Лемків в Польщы.