Конкурс на лоґо і favicon ансамблю «Ластівочка»

Лемківскій Ансамбль Пісні і Танця «Ластівочка» фунґує од 2001 рока. Был спочатку покликаний  як дітячо-молодіжна вокальна ґрупа Кружка Стоваришыня Лемків в Пшемкові. Через вшыткы рокы свойой активности, з камерального дітячого колективу «Ластівочка» выросла до єдного з найбарже ціненых лемківскіх фольклорных ансамблів на цілій Карпатскій Руси і поза єй границями. Того рока – кєд добрі порахуєме – ансамбль празднує своє 15-літя. То быти може малий ювілей, кєд зрівнаме фурт розвиваючу ся «Ластівочку» напр. до нашой репрезентацийой «Лемковины» з Білянкы, але то такой великій ювілей, кєд ся пізрит на дотеперішній доробок пшемківского колективу і задачу яку достал 15 років тому. А задача была і проста і тяжка – выхованя і інтеґрация лемківской молодежы, в духу привязаня до рідного языка і культуры. Доробок шумний – бронзовий топорец на 45. Медженародовым Фестівали Фольклору Гірскых Земель в Закопаным, а в лютым/фебруарі т.р., ансамбль отримал престіжний цертифікат CIOFF.

Рахуючы «Ластівочці» рокы, не тяжко спостеречы, же ансамбль за 15 років істнуваня не мат свого офіцияльного лоґо. Зато і округлий ювілей є добром нагодом, жебы і тота справа пішла допереду. Отже, Стоваришыня Лемків, котре старат ся про свій ансамбль, оголисло конкурс на запроєктуваня лоґо і favicon для ЛАПіТ «Ластівочка». Особа, котра предстваит найбарже атракцийний проєкт, котрий пак остане заапробуваний конкурсовом комісийом, буде нагороджена квотом 300 зл.

Лоґо то ґрафічний або текстовий символ, котрий представлят даякій конкретний субєкт або обєкт. Задачом такого знаку є скора інформация, котра асоциює ся – в тым примірі – з ансамбльом. Лоґо повинно быти легко одберане і спостерігане, прото мусит быти так запроєктуване, жебы было приємным для ока.

Favicon (скор. од анґ. favorites icon) – є то іконка, котра вказує ся перед адресом в адресовым поли інтернетовоgo переглядачa, або на карті з одкрытым сайтом www. Iкона тота має выміры 16х16 або 32х32 пікселі.

https://www.youtube.com/watch?v=flxK_prlNeU

Реґулямін конкурсу – за мотузком.