Концерт страдальных рускых і польскых пісен в Кракові

В найблизшу неділю, 20. марця, в краківскым клюбі Хімера, о 18.00 год. зачне ся концерт Старых і найстаршых польскых і рускых страдальных пісен, якій принесе настрій Великого Посту з давных часів Річпосполитой, коли попри собі жыло і істнувало вельо культур. Выступлят: лемківска піснярка Юлия Дошна та польский лютниста Антоний Пільх.

Юлия Дошна і Антоний Пільх, якы часто разом концертуют, в своім репертуарі презентуют стары, забыты, або одгребаны (напр. выдатным польскым фольклористом Оскаром Кольберґом) пісні з польско-украіньско-лемківского погранича. З нагоды Різдвяных Свят мож было іх чути з колядами, щедрівками, ци різдвяныма піснями, тепер, в періоді Великого Посту, слухачы почуют страдальны пісні, заспіваны і заграны з великым лемківско-польскым серцьом, а в пізнійшым часі напевно будут концертувати зо світскыма співанками, бо і такы дует Дошна-Пільх мат в своім репертуарі.

Антоний Пільх (вр. 1949 р.) – лютниста з Кракова, родом з Перемышля. Студиювал на Музычній Академіі в Кракові та в анґлицкым Royall Collage of Music, любитель ренесансовой музыкы. Орґанізатор фестівалю Лютні Світа, якого концерты проходят в найкрасшых просторах Малопольщы. Властитель ренесансово-барокового шляхетского двору в Высокій к. Рабкы, котрий в 90. роках ХХ ст. разом з женом Анном Мадейском (правнучком Генрика Сєнкєвича) купили і одремонтували. Основано в ним осередок студий над давнійшом культуром і музыком, особливо над старопольском музыком – тыма діянями занимат ся основана гын Фундация Старопольска Лютня. Во дворі парунадцет раз до рока стрічают ся музыкы, якы грают на старых існтрументах – Лютньове Братство і Академія Традициі.